Ինչ վիճակում է Հայաստանի տնտեսությունը․ Համաշխարհային բանկը նոր տվյալներ է ներկայացրել

Փետրվարին վերականգնվել են արտաքին առևտրի հոսքերը:

Հայաստանում տնտեսական ակտիվության աճի տեմպը հունվարի 7.6%-ից փետրվարին նվազել է՝ կազմելով 7.2%։ Տվյալները ներկայացված են Համաշխարհային բանկի ամսական տնտեսական ամփոփագրում։

Միաժամանակ, ըստ զեկույցի, արդյունաբերության և շինարարության ոլորտներում պահպանվել է բարձր աճ։

Գնաճը շարունակել է աճել՝ մարտին հասնելով 4.5%-ի, ինչը հիմնականում պայմանավորված է սննդամթերքի գների բարձրացմամբ։

Փետրվարին վերականգնվել են արտաքին առևտրի հոսքերը․ ինչպես արտահանումը, այնպես էլ ներմուծումը գրանցել են երկնիշ աճ՝ տարվա սկզբի կրճատումներից հետո։

Զուտ ոչ առևտրային դրամական փոխանցումները աճել են 5.2%-ով տարեկան կտրվածքով։

Ֆիսկալ հատվածում փետրվարին գրանցվել է բյուջեի պակասուրդ՝ ՀՆԱ-ի մոտ 0.2%-ի չափով, սակայն երկամսյա կուտակային հաշվեկշիռը պահպանվել է ավելցուկային։

Ներկայացված տվյալները ցույց են տալիս, որ տնտեսական աճը դանդաղում է, մինչդեռ գնաճային ճնշումները և արտաքին առևտրի ակտիվությունը շարունակում են ձևավորել տնտեսական միջավայրը։