Բաժնետոմսը՝ որպես իրական ակտիվ, այլ ոչ թե՝ թղթե իրավունք․ ինչպես է փոխվում Հայաստանի բիզնես միջավայրը

Այս գործիքակազմը թույլ կտա փոքր ներդրողներին ունենալ իրական ազդեցություն և պաշտպանվածություն:

Մայիսի 11-ին Ազգային ժողովի արտահերթ նիստում առաջին ընթերցմամբ ներկայացվել է «Բաժնետիրական ընկերությունների մասին» օրենքում փոփոխություններ կատարելու նախագիծը։ Նախաձեռնության նպատակն է պաշտպանել փոքր բաժնետերերին (հատկապես մինչև 5% բաժնեմաս ունեցողներին) մեծամասնական բաժնետերերի հնարավոր չարաշահումներից։

Ինչո՞ւ են անհրաժեշտ փոփոխությունները Ըստ նախագծի հեղինակ Ծովինար Վարդանյանի՝ ներկայիս կարգավորումներով շահույթի բաշխումը համարվում է ընկերության հայեցողական իրավունք։ Սա հնարավորություն է տալիս մեծամասնական բաժնետերերին տարիներ շարունակ չվճարել շահութաբաժիններ՝ փաստացի «սառեցնելով» փոքր ներդրողների կապիտալը։

Հետգնման նոր հիմքերը Նախագծով առաջարկվում է բաժնետիրոջը տալ բաժնետոմսերի հետգնման պահանջի իրավունք, եթե ընկերությունը.

• 10 տարի շահութաբաժին չի վճարել։

• 3 տարի ժողովներ չի գումարել։

• 5 տարի փաստացի գործունեություն չի իրականացրել կանոնադրական նպատակներով։

Արգելքների վերացում և գնահատում

• Գույքային սահմանափակման վերացում. Իրավունքի չարաշահման հիմքով հետգնման դեպքում առաջարկվում է չկիրառել զուտ ակտիվների 10%-ի սահմանափակումը։

• Շուկայական արժեքի որոշում. Կառավարությանը կլիազորվի սահմանել չափանիշներ այն մասնագետների համար, որոնք կիրականացնեն բաժնետոմսերի շուկայական արժեքի գնահատումը՝ ապահովելով գործընթացի անաչառությունը։

Արդարադատության նախարարի տեղակալ Տիգրան Դադունցի խոսքով՝ այս գործիքակազմը թույլ կտա փոքր ներդրողներին ունենալ իրական ազդեցություն և պաշտպանվածություն, ինչը կբարձրացնի Հայաստանի ներդրումային գրավչությունը։