Վենսը հայտարարել է, որ ԱՄՆ-ն պետք է իրավունք ունենա Գրենլանդիայի բնական պաշարների նկատմամբ

Վենսի հայտարարությունը կարող է նոր լարվածություն առաջացնել Դանիայի և ԱՄՆ-ի հարաբերություններում։

ԱՄՆ-ն ապահովում է Գրենլանդիայի անվտանգությունը և, հետևաբար, պետք է իրավունք ունենա կղզու բնական պաշարների նկատմամբ։ Այս մասին Newsmax-ին տված հարցազրույցում հայտարարել է ԱՄՆ փոխնախագահ Ջ.Դ. Վենսը։

«Նախ, մենք ուզում ենք բաժին ունենալ այս հանքանյութերով և ռեսուրսներով հարուստ տարածքի հարստությունից, որը մենք պաշտպանում ենք», – նշել է Վենսը։

Նրա խոսքով՝ Գրենլանդիայի անվտանգությունն իրականում ապահովում է ոչ թե Դանիան, այլ Միացյալ Նահանգների ռազմական ուժը։ Վենսը շեշտել է, որ հարցը ունի ռազմավարական նշանակություն ԱՄՆ ազգային անվտանգության համար։

«Սա կարևոր է ազգային անվտանգության տեսանկյունից։ Հարցրեք ինքներդ ձեզ՝ ի՞նչ կպատահի, եթե մեկ այլ երկիր միջմայրցամաքային բալիստիկ հրթիռ արձակի Միացյալ Նահանգների ուղղությամբ։ Արկտիկայի նկատմամբ վերահսկողության բացակայության դեպքում մեր ամբողջ հրթիռային պաշտպանության համակարգը կանկայունանա», – հայտարարել է ԱՄՆ փոխնախագահը։

Վենսի հայտարարությունը կարող է նոր լարվածություն առաջացնել Դանիայի և ԱՄՆ-ի հարաբերություններում՝ հաշվի առնելով, որ Գրենլանդիան հանդիսանում է Դանիայի թագավորության մաս, սակայն ունի ինքնավար կարգավիճակ և մեծ ռազմավարական ու ռեսուրսային նշանակություն Արկտիկայում։