Վանաձորի ՔԿՀ-ում կանխվել է թմրամիջոցի փոխանցման փորձ

Խուզարկությամբ քաղաքացու գոտկատեղի հատվածից հայտնաբերվել է մեկ փաթեթ՝ ընդհանուր 41.5 գրամ քաշով։

Քրեակատարողական ծառայության «Վանաձոր» տարածքային բաժնում կանխվել է թմրամիջոցի ապօրինի փոխանցման փորձ։

Այս մասին հայտնում են ՀՀ ԱՆ քրեակատարողական ծառայությունից։

Տեսահսկման ընթացքում կարճատև տեսակցությունների սենյակում նկատվել է քաղաքացու կասկածելի վարքագիծ, ինչից հետո իրականացվել է խուզարկություն։

Խուզարկությամբ քաղաքացու գոտկատեղի հատվածից հայտնաբերվել է մեկ փաթեթ՝ ընդհանուր 41.5 գրամ քաշով։

Զննությամբ պարզվել է, որ փաթեթում առկա են մարիխուանայի նմանվող բուսական զանգվածով երկու փաթեթ, ինչպես նաև սպիտակ փոշենման նյութով ևս երկու փաթեթ՝ ընդհանուր 17.2 գրամ քաշով։

Քաղաքացին ձերբակալվել է և հայտնաբերված նյութերի հետ ներկայացվել Քննչական կոմիտեի Լոռու մարզային քննչական վարչություն։