ԱՄՆ-ն կասեցնում է «Գրին քարտ» վիճակախաղի ծրագիրը․ անվտանգային ռիսկերը՝ ուշադրության կենտրոնում

ԱՄՆ-ն կասեցնում է «Գրին քարտ»՝ «Կանաչ քարտ» վիճակախաղի ծրագիրը Բրաունի համալսարանում տեղի ունեցած կրակոցներից հետո, քանի որ պարզվել է, որ հրաձգության համար կասկածվողը երկիր է մուտք գործել այդ ծրագրի միջոցով։ Այս մասին հայտարարել է ԱՄՆ ներքին անվտանգության նախարար Քրիստի Նոեմը։ 

«Նախագահ Թրամփի ցուցումով ես անմիջապես հրահանգում եմ ԱՄՆ քաղաքացիության և ներգաղթի ծառայություններին (USCIS) կասեցնել «Բազմազանության վիզա 1» (DV1) ծրագիրը՝ ապահովելու, որ ամերիկացիներն այլևս չտուժեն այս աղետալի ծրագրից», - գրել է նա X-ում։ 

Ըստ Նոեմի՝ կասկածյալ Կլաուդիո Մանուել Նևես Վալենտեն Միացյալ Նահանգներ է մուտք գործել «Բազմազանության վիզա» ծրագրի միջոցով 2017 թվականին, և նրան տրամադրվել է «Գրին քարտ»:

Բրաունի համալսարանում հրաձգությունն իրականացվել է դեկտեմբերի 14-ին։ Այդ օրը համալսարանում անցկացվում էին ավարտական ​​քննություններ: Երկու մարդ զոհվել է, ինը՝ վիրավորվել։ Նույն կասկածյալը նաև մեղադրվում է Բրաունի համալսարանում հրաձգությունից երկու օր անց Բոստոնում Մասաչուսեթսի տեխնոլոգիական ինստիտուտի դասախոսի սպանության համար։ Դեկտեմբերի 18-ին 48-ամյա հրաձիգին մահացած են գտել Նյու Հեմփշիրում՝ պահեստում. նա ինքնասպանություն էր գործել։

Ըստ ABC News-ի՝ պորտուգալացի Վալենտեն 2000 թվականին Բրաունի համալսարանի ուսանող էր։ Նա բնակվում էր Մայամիում։  

1990-ականներին մեկնարկած ծրագիրը տարեկան 50 000 վիզա է տրամադրում այն երկրների քաղաքացիներին, որտեղից ԱՄՆ ներգաղթի տեմպերը համեմատաբար ցածր են։ Թեկնածուները պատահականորեն ընտրվում են վիճակախաղի միջոցով: Ամեն տարի տասնյակ միլիոնավոր մարդիկ են դիմում ծրագրի միջոցով վիզաներ ստանալու համար։

ԱՄՆ նախագահ Դոնալդ Թրամփը բազմիցս քննադատել է «Գրին քարտ» վիճակախաղի ծրագիրը՝ պնդելով, որ այն կարող է անվտանգության ռիսկեր առաջացնել և բավարար չափով հիմնված չէ մարդկանց արժանիքների վրա, ինչպես աշխատանքային վիզաները: Իր առաջին նախագահական ժամկետի սկզբում նա պնդում էր, որ ծրագիրը կասեցվի այն բանից հետո, երբ 2017 թվականին Նյու Յորքում «Գրին քարտ» ստացած Ուզբեկստանից մի տղամարդ բեռնատարով վրաերթի ժամանակ սպանեց ութ մարդու: 

Թրամփի առաջին վարչակազմը կասեցրեց ծրագիրը 2020 թվականին՝ օրինական ներգաղթի ավելի լայն սահմանափակումների շրջանակներում, դա պատճառաբանելով COVID-19 համավարակի տնտեսական հետևանքներով: ԱՄՆ նախկին նախագահ Ջո Բայդենը 2021 թվականին վերսկսեց «Գրին քարտի» տրամադրումը: