ԱՄՆ-ը նախատեսում է մեծացնել թևավոր հրթիռների արտադրությունը

Ծրագիրը ներառում է երեք ուղղություն:

Կանադացի ռազմական վերլուծաբան Քոլբի Բադհվարի գնահատմամբ՝ ԱՄՆ պաշտպանության նախարարությունը նախատեսում է առաջիկա հինգ տարում ձեռք բերել շուրջ 28 հազար FAMM-P և FAMM-L տեսակի թևավոր հրթիռներ։

Կանխատեսվում է, որ 2030 թվականից արտադրության ծավալները կաճեն՝ տարեկան գերազանցելով 7 հազար միավորը։ Այս նպատակով ԱՄՆ ռազմաօդային ուժերը 2027 թվականի բյուջեով պահանջել են ավելի քան 350 մլն դոլար՝ փորձնական արտադրության մեկնարկի համար։

FAMM նախաձեռնությունը նպատակ ունի ստեղծել նոր սերնդի ճշգրիտ զինատեսակներ, որոնք զգալիորեն ավելի մատչելի կլինեն գործող համակարգերից, ինչպիսիք են Tomahawk-ը կամ JASSM-ը։

Բարձր արժեքը սահմանափակում է այդ համակարգերի կիրառման ծավալը, ինչի արդյունքում զանգվածային օգտագործումը մեծ բեռ է ստեղծում պաշտպանական բյուջեի համար։

Ըստ հրապարակված տվյալների՝ վերջին ռազմական գործողությունների ընթացքում ԱՄՆ-ը օգտագործել է հազարավոր բարձրարժեք հրթիռներ, ինչը հանգեցրել է միլիարդավոր դոլարների ծախսերի։

Նոր ծրագրով նախատեսվում է մեկ հրթիռի արժեքը սահմանափակել 200-300 հազար դոլարով՝ ապահովելով զանգվածային արտադրություն և կիրառման ընդլայնում։

Տեխնիկական պահանջները ներառում են ավելի քան 460 կմ խոցման հեռավորություն և գործունակություն նույնիսկ արբանյակային կապի խափանման դեպքում։

Ծրագիրը ներառում է երեք ուղղություն՝ օդային բեռնատարներից արձակվող, կործանիչների համար նախատեսված և երկար հեռահարության հրթիռների մշակում։

Ներկայացված մոտեցումը ցույց է տալիս, որ ԱՄՆ-ը փորձում է վերանայել զինատեսակների արտադրության մոդելը՝ անցնելով ավելի մասշտաբային և ծախսարդյունավետ լուծումների։