Աննախադեպ շոգ ամառ է կանխատեսվում․ ինչ իրավիճակ է սպասվում

Գիտնականները կանխատեսում են, որ առաջիկա ամիսներին կարող է ձևավորվել ուժեղ Էլ Նինյո, որը կարող է բարձրացնել գլոբալ ջերմաստիճանը։

Այս մասին հայտնում է ԱՄՆ Ազգային օվկիանոսային և մթնոլորտային վարչության (NOAA) կլիմայի կանխատեսման կենտրոնը։

Կենտրոնի գնահատմամբ՝ հունիսից օգոստոս ընկած ժամանակահատվածում ուժեղ Էլ Նինյոյի ձևավորման հավանականությունը կազմում է 62%։

Էլ Նինյոն Էլ Նինյո-Հարավային տատանման (ENSO) տաք փուլն է, որը պայմանավորված է արևադարձային Խաղաղ օվկիանոսում ջրի և մթնոլորտի ջերմաստիճանային փոփոխություններով։ Այդ գործընթացը կարող է ազդել եղանակային համակարգերի վրա ամբողջ աշխարհում։

Ներկայումս Խաղաղ օվկիանոսը գտնվում է Լա Նինյա փուլում, որը ENSO-ի սառը փուլն է, սակայն դիտարկումները ցույց են տալիս, որ այն կարող է ավարտվել առաջիկա շաբաթներին։

Գիտնականների գնահատմամբ՝ Էլ Նինյոյի ուժգնությունը մնում է անորոշ։ Կան սցենարներ, որոնց դեպքում այն կարող է վերածվել ավելի ուժեղ փուլի՝ այսպես կոչված «սուպեր Էլ Նինյոյի», երբ օվկիանոսի մակերևույթի ջերմաստիճանը զգալիորեն գերազանցում է երկարաժամկետ միջին մակարդակը։

Ըստ գնահատականների՝ նման սցենարի հավանականությունը նոյեմբերին փոթորիկների սեզոնի ավարտին կազմում է մոտ 15%, իսկ հոկտեմբեր-դեկտեմբեր ժամանակահատվածում ուժեղ Էլ Նինյոյի ձևավորման հավանականությունը գնահատվում է շուրջ մեկ երրորդ։

Էլ Նինյոյի փուլը կարող է փոխել գլոբալ եղանակային համակարգերը՝ մեծացնելով փոթորիկների ակտիվությունը Խաղաղ օվկիանոսում և նվազեցնելով այն Ատլանտյան օվկիանոսում։

ENSO ցիկլը սովորաբար կրկնվում է յուրաքանչյուր 2-7 տարին մեկ, և յուրաքանչյուր փուլ կարող է տևել 9-ից 12 ամիս՝ կախված կլիմայական պայմաններից։