Տարածաշրջանի տրանսպորտային ենթակառուցվածքների սպասվող բացումը նոր հնարավորություններ է բացելու մեզ համար հանքարդյունաբերության ոլորտում. Փաշինյան

Հանքարդյունաբերությունը գիտելիքահեն ոլորտ է, քանի որ արդյունավետ հանքարդյունաբերությունը պահանջում է բարձր որակի մասնագետներ, ընդ որում՝ ոչ թե մեկ, այլ բազմաթիվ ուղղությունների բարձր որակի մասնագետներ։ Այդ մասին Ծաղկաձորում մեկնարկած Հայաստանի հանքարդյունաբերական ֆորումի ժամանակ ասաց ՀՀ վարչապետ Նիկոլ Փաշինյանը:

«Նկատի ունեմ հանքարդյունաբերությունը կրթության լոկոմոտիվ է, նաև տնտեսության լոկոմոտիվ է, որովհետև հանքը շահագործելու համար բազմաթիվ այլ տնտեսվարողներ են աշխատում, և գործունեության բազմաթիվ այլ ձևեր են զարգանում։ Ես պարզապես ուզում եմ, որ մենք ուշադրություն հրավիրենք այն փաստի վրա, որ հանքարդյունաբերությունը Հայաստանի ներսում մարդկանց մասնագիտական կարիերա անելու շատ մեծ հնարավորություններ է տալիս, և ինչքան բարձրացնենք մեր հանքարդյունաբերության ստանդարտը, այնքան ավելի կշատանան բարձր որակավորում ունեցող մասնագետները»,- ասաց նա՝ ընդգծելով, որ ոլորտում բանվորական ուժի պահանջարկ կա նաև:

Փաշինյանը կարևորեց նաև հանքարդյունաբերության ոլորտի շուրջ խոսակցություն և երկխոսություն ծավալելը՝ հաշվի առնելով նաև այն հանգամանքը, որ տեխնոլոգիաները մի իքս պահի զարգանալու են. «Խոսակցությունը պետք է լինի ինչ անել, որպեսզի մեր երկրում հանքարդյունաբերությունը համապատասխանի ավելի բարձր ստանդարտների՝ թեկուզ միավոր հանքանյութից մետաղի կամ կորզման տոկոսի հետ կապված»:

Վարչապետը մեծագույն խնդիր որակեց նաև այն, որ Հայաստանը ստիպված է հանքանյութ արտահանել: Կարծիք հայտնեց, թե հարկավոր է ոլորտը զարգացնել այն ուղղությամբ, որ հանքանյութի մշակման շղթան հնարավորինս երկարացվի և հնարավորինս բերվի վերջնական արտադրանքի, որովհետև դա կենթադրի լրացուցիչ աշխատատեղեր, լրացուցիչ եկամուտներ պետական բյուջեի համար, լրացուցիչ բարձր որակավորման մասնագետների պահանջարկ, լրացուցիչ ներդրումներ տնտեսության, կրթության ոլորտներում, ինչպես նաև՝ բարեկեցության նոր աստիճան:

«Հույս ունեմ, որ առաջիկա գործընթացները, այդ թվում՝ տարածաշրջանային, ավելի նպաստավոր կդարձնեն միջավայրն այս առումով, որովհետև Հայաստանի և Ադրբեջանի միջև հաստատված խաղաղությունը և տարածաշրջանի տրանսպորտային ենթակառուցվածքների սպասվող բացումը, որն առաջիկայում անպայման տեղի կունենա, նոր հնարավորություններ է բացելու մեզ համար այս ոլորտում»,- ասաց նա՝ հավելելով, որ պետք է մտածել, թե ինչ պետք է անել, որ Հայաստանում արդյունավետ պղնձաձուլարան ունենալու պայմանավորվածությունն իրականություն դառնա:

«Բայց նույնիսկ սա շղթայի ավարտը չէ, որովհետև եթե մենք արդեն ձուլակտորներ կամ մետաղ ենք ստանում, պետք է մտածել այդ շղթայի հետագա երկարացման մասին, որպեսզի պղնձի արտադրանքը կամ այն արտադրանքները, որի մեջ պղինձը լայնորեն օգտագործվում է, Հայաստանում այդպիսի արդյունաբերական պլատֆորմներ և ներդրումներ նույնպես լինեն: Նույնը վերաբերում է ոսկուն: Եվ սա էլ մի խնդիր է, որ չափազանց կարևոր է»,- ասաց նա: