«Տիտանիկ»-ի ուղևորուհու փրկարարական բաճկոնը վաճառվել է 670,000 եվրոյով

Նույն աճուրդում Titanic-ի փրկարար նավակներից մեկի նստատեղի բարձը վաճառվել է 390,000 ֆունտ ստերլինգով։

Titanic-ի ուղևորուհու կրած փրկարարական բաճկոնը աճուրդում վաճառվել է 670,000 ֆունտ ստերլինգով (մոտ 906,000 դոլար)։ Տվյալները ներկայացրել է Associated Press-ը։

Բաճկոնը պատկանել է առաջին կարգի ուղևորուհի Լաուրա Մեյբլ Ֆրանկատելին, ով այն կրել է նավի խորտակման ժամանակ փրկարար նավակ տեղափոխվելիս։ Այն առանձնանում է նրանով, որ ստորագրված է ինչպես իր, այնպես էլ նույն նավակի մյուս վերապրածների կողմից։

Աճուրդը կազմակերպվել է Henry Aldridge & Son ընկերության կողմից Անգլիայի Դեվիզես քաղաքում։ Նշված լոտը դարձել է միջոցառման գլխավոր առարկան և վաճառվել է հեռախոսային աճուրդի միջոցով՝ զգալիորեն գերազանցելով նախնական 250,000-350,000 ֆունտ գնահատականը։

Նույն աճուրդում Titanic-ի փրկարար նավակներից մեկի նստատեղի բարձը վաճառվել է 390,000 ֆունտ ստերլինգով (մոտ 527,000 դոլար)։ Այն ձեռք են բերել ԱՄՆ-ում գործող երկու թանգարանների ներկայացուցիչները։

Ներկայացված գործարքները ցույց են տալիս, որ պատմական նշանակություն ունեցող առարկաների նկատմամբ պահանջարկը պահպանվում է, հատկապես երբ դրանք կապված են փաստագրված իրադարձությունների և անձնական պատմությունների հետ։