Կառավարությունը հերքում է Ջիլիզա գյուղը Վրաստանին փոխանցելու լուրերը

Նման բովանդակությամբ հրապարակումները եղել և մնում են մտացածին:

Հայաստանի վարչապետի մամուլի քարտուղար Նազելի Բաղդասարյանը հերքել է լրատվամիջոցներում տարածված տեղեկությունը, ըստ որի՝ սահմանազատման գործընթացի շրջանակում Հայաստանը պատրաստվում է Վրաստանին փոխանցել Ալավերդի համայնքի Ջիլիզա գյուղը։

Նա «Ֆեյսբուք»-ի իր էջում նշել է, որ նման տեղեկատվությունը որևէ կապ չունի իրականության հետ։

«Հայաստանի Հանրապետության ինքնիշխան տարածքի որևէ հատվածի որևէ այլ երկրի փոխանցելու մտադրության, ծրագրի կամ պայմանավորվածության մասին որևէ հայտարարություն չի կարող համապատասխանել իրականությանը»,– գրել է Բաղդասարյանը։

Նրա խոսքով՝ նման բովանդակությամբ հրապարակումները եղել և մնում են մտացածին, և կառավարությունը դրանք շարունակելու է հերքել։

Հիշեցնենք, որ ավելի վաղ վարչապետ Նիկոլ Փաշինյանը հայտարարել էր, որ կառավարության օրակարգում է Վրաստանի հետ սահմանազատման գործընթացի ամփոփումը։