Սոցիալական նպաստ, որը գոյություն չունի․ TikTok-ում նոր խարդախ սխեմայի վտանգները

Նման տվյալների փոխանցումը կարող է հանգեցնել քաղաքացիների դրամական միջոցների հափշտակմանը և այլ ֆինանսական վնասների։

Ներքին գործերի նախարարությունը տեղեկացնում է, որ «TikTok» սոցիալական հարթակում տարածվում են հրապարակումներ, որոնցում ՀՀ քաղաքացիներին առաջարկվում է իբր «սոցիալական հիմնադրամից» 300 հազար դրամ նպաստ ստանալու հնարավորություն՝ սահմանափակ ժամանակահատվածում հղմամբ անցնելու և դիմում ներկայացնելու միջոցով։

ՆԳՆ-ի փոխանցմամբ՝ նշված հրապարակումները իրականությանը չեն համապատասխանում։ Այս եղանակով հանցավոր խմբերը փորձում են ձեռք բերել քաղաքացիների անձնական և բանկային տվյալները, այդ թվում՝ բանկային քարտի համարները, PIN և CVV կոդերը, ինչպես նաև մեկանգամյա հաստատման կոդերը։

Նման տվյալների փոխանցումը կարող է հանգեցնել քաղաքացիների դրամական միջոցների հափշտակմանը և այլ ֆինանսական վնասների։

ՆԳՆ-ն ընդգծում է, որ ՀՀ պետական և սոցիալական մարմինները սոցիալական ցանցերի միջոցով չեն հավաքագրում քաղաքացիների անձնական կամ բանկային տվյալներ։ Բացի այդ, պետական կառույցները պաշտոնական հաղորդակցման համար օգտագործում են բացառապես հայկական «.am» դոմենային անվանումներ, այդ թվում՝ mlsa.am, socservice.am, mia.gov.am, moh.am, e-request.am։

ՆԳՆ-ն հորդորում է քաղաքացիներին զգոն լինել սոցիալական ցանցերում տարածվող նմանատիպ առաջարկների նկատմամբ։