Սևանի ԲԿ–ի տնօրենը մեղադրվում է խոշոր չափերի գույքի հափշտակության և խմբի կազմում կեղծիք կատարելու մեջ

Մեղադրանք է առաջադրվել նաև տնօրենի մտերիմ անձին և բժշկական կենտրոնի աշխատակցին։

ՀՀ հակակոռուպցիոն կոմիտեն հայտնել է, որ «Սևանի բժշկական կենտրոն» ՓԲԸ-ի տնօրենը մեղադրվում է խոշոր չափերի հափշտակության և փաստաթղթերի կեղծման մեջ։

Քրեական վարույթի շրջանակում պարզվել է, որ տնօրենը 2022 թվականին աշխատանքի է ընդունել իր մտերիմ անձին, որը մինչև 2024 թվականի նոյեմբեր չի հաճախել աշխատանքի և չի կատարել իր պարտականությունները։

Միևնույն ժամանակ, ըստ քննության, տնօրենը մեկ այլ աշխատակցի հետ նախնական համաձայնությամբ կազմել է կեղծ փաստաթղթեր՝ իբր այդ անձը հաճախել է աշխատանքի։

Արդյունքում բժշկական կենտրոնի բյուջեից որպես աշխատավարձ ավելի է վճարվել 2,238,745 դրամ։

Տնօրենին մեղադրանք է առաջադրվել ՀՀ քրեական օրենսգրքի համապատասխան հոդվածներով։ Նրա նկատմամբ որպես խափանման միջոց կիրառվել է պաշտոնավարման կասեցում և բացակայելու արգելք։

Մեղադրանք է առաջադրվել նաև տնօրենի մտերիմ անձին և բժշկական կենտրոնի աշխատակցին։

Հակակոռուպցիոն կոմիտեն նաև տեղեկացրել է, որ պետությանը պատճառված վնասը ամբողջությամբ վերականգնվել է։

Քրեական գործի նախաքննությունն ավարտվել է, և այն ուղարկվել է հակակոռուպցիոն դատարան։