Գիտության ֆինանսավորում, խցանումների խնդիր․ 5 կարևոր լուր՝ Կառավարության նիստից

ՀՀ կառավարությունը վերջին նիստում ընդունել է մի շարք կարևոր որոշումներ, որոնք վերաբերում են ինչպես միջազգային միջոցառումների կազմակերպմանը, այնպես էլ քաղաքաշինությանը, գիտության զարգացմանը, սոցիալական աջակցությանը և տրանսպորտային խնդիրների լուծմանը։

Ստորև՝ ամենակարևոր 5 լուրերը մեկտեղված։

Աշխատանքային օրվա տեղափոխում՝ ԵՔՀ գագաթնաժողովի պատճառով
2026թ․ մայիսի 3-4-ը Երևանը կհյուրընկալի Եվրոպական քաղաքական համայնքի 8-րդ գագաթնաժողովը՝ շուրջ 50 բարձրաստիճան պատվիրակությունների մասնակցությամբ։ Քաղաքում տրանսպորտի արդյունավետ կազմակերպման համար որոշվել է մայիսի 4-ի աշխատանքային օրը տեղափոխել ապրիլի 18-ի շաբաթ օրը։

«Պասկևիչի բլուր»․ Երևանի նոր բազմաֆունկցիոնալ կենտրոն
Կառավարությունը լիազորել է Երևանի քաղաքապետին պայմանագիր կնքել Նորագյուղ թաղամասի շուրջ 83.9 հա տարածքի զարգացման համար։ Նախատեսվում է մինչև 2–2.5 մլն քմ կառուցապատում, շուրջ 155 շենք, կանաչ գոտիներ, նոր ճանապարհներ, ստորգետնյա ավտոկայանատեղիներ և նույնիսկ մինչև 70 հարկանի երկնաքեր։ Ծրագիրը նպատակ ունի բեռնաթափել Երևանի փոքր կենտրոնը։

Գիտության զարգացման ռազմավարություն՝ 2026–2030թթ․
ԿԳՄՍ նախարարությունը ներկայացրել է գիտության զարգացման նոր ռազմավարական ծրագիրը՝ 94 գործողությամբ։ Թիրախների թվում են՝

• 400 արտերկրյա առաջատար գիտնականների ներգրավում ՀՀ-ում,

• 1000 հայ գիտաշխատողների վերապատրաստում արտասահմանում,

• գիտության ֆինանսավորումը մինչև 2030թ․ հասցնել ՀՆԱ-ի շուրջ 1%-ի։

Խնայբանկի ավանդների փոխհատուցումը կշարունակվի 2026-ին
Պետությունը կշարունակի փոխհատուցում վճարել խորհրդային Խնայբանկի ավանդատուներին՝ մինչև 1944թ․ դեկտեմբերի 31-ը ծնված ՀՀ ռեզիդենտներին։ Առաջնահերթություն կունենան պատերազմի վետերաններն ու սահմանամերձ գյուղերի բնակիչները։

Երևանի խցանումներ․ երկարաժամկետ լուծումներ և ԱԲ կիրառություն
Կառավարությունը ընդունում է, որ Երևանի խցանումները դարձել են համակարգային խնդիր։ Լուծումները նախատեսվում են առաջիկա տասնամյակների կտրվածքով՝ ներառելով ճանապարհային նոր ենթակառուցվածքներ և արհեստական բանականության գործիքների կիրառում տրանսպորտի կառավարման ոլորտում։