Վրաստանում բացվել է Ռիկոտի լեռնանցքով անցնող արագընթաց մայրուղու նոր 52 կմ հատվածը

Ռիկոտի լեռնանցքով անցնող ճանապարհը հանդիսանում է E-60 եվրոպական տարանցիկ միջանցքի մի մասը։

Վրաստանում այսօրվանից շահագործման է հանձնվել Ռիկոտի լեռնանցքով անցնող արագընթաց մայրուղու 52 կիլոմետրանոց նոր հատվածը, որը միացնում է երկրի արևմտյան և արևելյան հատվածները։ Այդ մասին հայտարարել է Վրաստանի տարածաշրջանային զարգացման և ենթակառուցվածքների նախարարությունը։

Մայրուղու շինարարությունը մեկնարկել է 2019 թվականին և իրականացվել չորս փուլով։ Առանձին հատվածներ երթևեկության համար բացվել են փուլ առ փուլ, իսկ առաջին՝ երկու կիլոմետրանոց հատվածը շահագործման է հանձնվել 2020 թվականին։

Նախագիծը ներառում է 51 թունել և 97 կամուրջ։ Ամենաերկար թունելի երկարությունը կազմում է 1.8 կիլոմետր, իսկ ամենաերկար կամուրջինը՝ մոտ 1.4 կիլոմետր։ Նախարարության տվյալներով՝ մայրուղին համալրված է ժամանակակից լուսավորության համակարգերով և համապատասխանում է միջազգային ճանապարհային անվտանգության չափանիշներին։

Նախագծի ընդհանուր արժեքը կազմել է մոտ 2.6 միլիարդ լարի։ Այն համաֆինանսավորվել է Ասիական զարգացման բանկի, Եվրոպական ներդրումային բանկի, Համաշխարհային բանկի և Վրաստանի պետական բյուջեի միջոցներով։

Ռիկոտի լեռնանցքով անցնող ճանապարհը հանդիսանում է E-60 եվրոպական տարանցիկ միջանցքի մի մասը։ Միջանցքը սկսվում է Ֆրանսիայի Բրեստ քաղաքից և ավարտվում Ղրղզստանի Իրկեշտամ քաղաքում՝ հանդիսանալով Եվրոպայի երկրորդ խոշոր տարանցիկ երթուղիներից մեկը։ Վրաստանի տարածքում E-60 միջանցքի երկարությունը կազմում է 392 կիլոմետր՝ Ադրբեջանի հետ սահմանից մինչև Սև ծովի ափին գտնվող Փոթի նավահանգիստ։