Առաջարկվում է ընդլայնել զինծառայողների սոցիալական երաշխիքների շրջանակը․ ինչ կարգավորումներ են նախատեսվում

ՀՀ աշխատանքի և սոցիալական հարցերի նախարարությունը առաջարկում է փոփոխություններ կատարել զինծառայողների վնասների հատուցման համակարգում՝ ընդլայնելով սոցիալական երաշխիքների շրջանակը։

Նախագիծը հրապարակվել է e-draft.am հարթակում և վերաբերում է «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքին։

Առաջարկվում է փոխհատուցման շրջանակում ներառել ոչ միայն 2017 թվականից հետո տեղի ունեցած դեպքերը, այլ նաև 1998–2016 թվականների ժամանակահատվածը՝ մարտական գործողությունների և ծառայության ընթացքում պատճառված վնասների համար։

2008–2016 թվականների դեպքերի շահառուները արդեն սահմանված են, և հատուցումները կիրականացվեն համապատասխան հիմնադրամի միջոցով։ Ավելի վաղ՝ 1998–2007 թվականների դեպքերի համար շահառուների շրջանակը կճշտվի փաստաթղթերի հիման վրա կամ հատուկ հանձնաժողովի եզրակացությամբ։

Նախատեսվում է, որ նշված ժամանակահատվածի դեպքերի համար կկիրառվի ամսական վճարման մեխանիզմ՝ մինչև 20 տարի ժամկետով։

Նախագիծը նպատակ ունի բարձրացնել հատուցման համակարգի ընդգրկումը և արդյունավետությունը՝ ներառելով նախկինում չընդգրկված դեպքերը։