ՊՆ պաշտոնյան մեղադրվում է 11.000 դոլար կաշառք ստանալու մեջ

Նախաքննությունն ավարտվել է, և քրեական վարույթի նյութերը մեղադրական եզրակացությամբ ուղարկվել են ՀՀ հակակոռուպցիոն դատարան։

ՀՀ հակակոռուպցիոն կոմիտեի կողմից իրականացված օպերատիվ-հետախուզական միջոցառումների արդյունքում նախաձեռնված քրեական վարույթով պարզվել է, որ ՀՀ պաշտպանության նախարարության հանրապետական զինվորական կոմիսարիատի մարզային ստորաբաժանման պաշտոնատար անձը, իր ծառայողական լիազորություններն օգտագործելով, տարբեր անձանց օգտին ապօրինի գործողություններ կատարելու համար ստացել է խոշոր չափերի կաշառք։

Նախաքննությամբ պարզվել է, որ Գեղարքունիքի մարզի բնակիչը, իր որդուն պարտադիր զինվորական ծառայությունից 3 տարի ժամկետով տարկետում տրամադրելու նպատակով, միջնորդի միջոցով պայմանավորվածություն է ձեռք բերել ՊՆ պաշտոնատար անձի հետ։ Վերջինս 2025 թվականի հուլիսին պահանջել է 11.000 ԱՄՆ դոլար կաշառք։

Բացահայտվել են նաև նույն պաշտոնատար անձի կողմից քաղաքացիների օգտին ապօրինի գործողությունների այլ դրվագներ՝ վարժական հավաքներին չմասնակցելու գործընթաց կազմակերպելու և դրան օժանդակելու դեպքեր։

Մեկ դեպքում պաշտոնյան, օրենքով սահմանված հիմքերի բացակայությամբ, քաղաքացու վարժական հավաքներից խուսափելու դիմաց ստացել է ավելի քան 1 մլն դրամ արժողությամբ տարբեր ապրանքներ։ Մյուս դեպքում, մեկ այլ պաշտոնատար անձի հետ նախնական համաձայնությամբ, կազմվել է կեղծ բժշկական եզրակացություն՝ ծանոթին հավաքներից ազատելու նպատակով։

ՊՆ պաշտոնատար անձին մեղադրանք է առաջադրվել ՀՀ քրեական օրենսգրքի մի շարք հոդվածներով։ Նրա նկատմամբ որպես խափանման միջոց կիրառվել է տնային կալանքը։ Մեղադրանքներ են ներկայացվել ևս 3 անձի։

Նախաքննությունն ավարտվել է, և քրեական վարույթի նյութերը մեղադրական եզրակացությամբ ուղարկվել են ՀՀ հակակոռուպցիոն դատարան։