ՊԵԿ-ում քննարկվել են մաքսային բարեփոխումների նոր քայլերը

Ներկայացվել է ExIm տեղեկատվական հարթակը՝ ընդգծելով դրա հնարավորություններն ու զարգացման հեռանկարները։

Պետական եկամուտների կոմիտեի նախագահ Էդուարդ Հակոբյանի գլխավորությամբ տեղի է ունեցել Մաքսային բարեփոխումների և ռիսկերի կառավարման խորհրդի հերթական նիստը։

ՊԵԿ-ից հայտնում են, որ քննարկվել են մաքսային համակարգում ընթացող բարեփոխումներն ու նոր նախաձեռնությունները։

Նիստի ընթացքում ներկայացվել են օդանավակայանում ուղևորների հսկողության նոր մոդելի ներդրմանն առնչվող հարցեր՝ անդրադառնալով ուղեբեռի զննման, ռիսկերի պրոֆիլների և օպերատիվ աշխատանքների համակարգմանը։

Քննարկվել է նաև ռենտգեն պատկերների վերլուծության մոնիթորինգային կենտրոնի ստեղծման ընթացքը, առկա ռեսուրսներն ու գործարկման ժամկետները։

Ներկայացվել է ExIm տեղեկատվական հարթակը՝ ընդգծելով դրա հնարավորություններն ու զարգացման հեռանկարները։

Օրակարգում ներառված են եղել նաև այլ երկրների հետ տվյալների փոխանակման ընդլայնման, արժեքային բազաների հասանելիության, ինչպես նաև մաքսային պատասխանատվության նորմերի վերանայման հարցերը։

ՊԵԿ նախագահը կարևորել է մաքսային ծառայության ռազմավարական ծրագրերի իրականացումը, ժամկետների պահպանումը և միջազգային փորձի կիրառումը՝ տնտեսվարողների կարգապահության բարձրացման նպատակով։