ՊԵԿ-ում քննարկվել են թվայնացման առաջնահերթ նախագծերը

Նշվել է նաև միջազգային փորձի ուսումնասիրության և տեղայնացման անհրաժեշտությունը։

Պետական եկամուտների կոմիտեի նախագահ Էդուարդ Հակոբյանի գլխավորությամբ տեղի է ունեցել ՊԵԿ թվայնացման խորհրդի հերթական նիստը, որի ընթացքում քննարկվել են ռազմավարական զարգացմանն ուղղված թվայնացման նախագծերը։

ՊԵԿ-ի հաղորդմամբ՝ նիստի ընթացքում կարևորություն է տրվել թվայնացման կարիքների գնահատմանը, խնդիրների հստակեցմանը և դրանց լուծումների մշակմանը՝ հիմք ընդունելով ռազմավարական և իրավական փաստաթղթերը։

«Ջի սոլյուշնս» ՊՈԱԿ-ի կողմից ներկայացվել է թվայնացման նախագծերի կառավարման Dashboard-ը, ինչպես նաև ընթացիկ ծրագրերի իրականացումը։

Քննարկվել են հարկային և մաքսային համակարգերի թվայնացման ուղղությամբ իրականացվող նախագծերը՝ սահմանելով առաջնահերթությունները և անդրադառնալով տեխնիկական խնդիրներին։

Խորհրդի նիստում ներկայացվել են նաև նոր նախաձեռնություններ, այդ թվում՝ միասնական հարթակի ստեղծում՝ վիճակագրական տվյալների հրապարակման համար, որը արժանացել է հավանության։

Առանձնակի ընդգծվել է թվային հարթակների ներդրման կարևորությունը՝ հարկ վճարողների սպասարկման որակի բարձրացման նպատակով։

Նշվել է նաև միջազգային փորձի ուսումնասիրության և տեղայնացման անհրաժեշտությունը։

Ամփոփելով նիստը՝ ՊԵԿ նախագահը կարևորել է ծրագրերի արդյունավետ իրականացումը, հաշվետվողականությունը և սահմանված ժամկետների պահպանումը։