ՊԵԿ-ը հայտարարում է խաղային գործունեության կարգավորման օպերատորի ընտրության բաց մրցույթ

Հաղթող ճանաչված հայտատուն Հայաստանում պետք է ստեղծի նոր ընկերություն։

Պետական եկամուտների կոմիտեն հայտնում է, որ Հայաստանում նախատեսվում է ներդնել խաղային գործունեության վերահսկողության նոր համակարգ, որի նպատակն է ապահովել ոլորտի թափանցիկությունն ու արդար կարգավորումը։

Այս նպատակով ձևավորված է Խաղային գործունեության կարգավորման օպերատորի ընտրության միջգերատեսչական հանձնաժողով, որը հայտարարում է բաց մրցույթ օպերատորի ընտրության համար։ Նոր օպերատորը պետք է ապահովի խաղային շուկայի արդյունավետ վերահսկողություն և ռիսկերի կառավարման ժամանակակից մեխանիզմների ներդրում։

Օպերատորի պարտավորություններն ու գործառույթները

Հաղթող ճանաչված հայտատուն Հայաստանում պետք է ստեղծի նոր ընկերություն, որի հետ ՊԵԿ-ը 15 տարվա ժամկետով կկնքի պայմանագիր։ Օպերատորի գործունեությունը կֆինանսավորվի ոլորտում գործող կազմակերպությունների միջոցներով։

Օպերատորի գործառույթները ներառում են՝

• վկայագրերի տրամադրում և խաղային արտադրանքների սերտիֆիկացում,

• մոնիտորինգի կենտրոնի ստեղծում և գործարքների տեխնիկական վերահսկողություն,

• քաղաքականության և ստանդարտների մշակում,

• համագործակցություն պետական մարմինների հետ և խորհրդատվական աջակցություն,

• խաղային շուկայի ընդհանուր մոնիտորինգ և տվյալների վերլուծություն։

Թեկնածուների պահանջները

Մրցույթին մասնակցելու համար սահմանվել են խիստ ֆինանսական, մասնագիտական և տեխնիկական պահանջներ։

Թեկնածուները պետք է՝

• ունենան առնվազն 10 մլն ԱՄՆ դոլարի սեփական կապիտալ,

• ապահովեն 3 մլն դոլարի ազատ դրամական հոսքեր և նույնքան հասանելի ֆինանսավորում,

• ներկայացնեն միջազգային փորձ խաղային մոնիտորինգային համակարգերի նախագծման և ներդրման ոլորտում,

• ունենան ISO/IEC 27001:2022 ստանդարտի հավաստագիր,

• ձևավորեն պրոֆեսիոնալ թիմ՝ ՏՏ, կիբերանվտանգության, AML/CFT, տվյալների պաշտպանության և որակի ապահովման փորձագետներով։

Մրցույթի ժամկետներն ու դիմելու կարգը

Որակավորման հայտերը պետք է ներկայացնել թղթային տարբերակով՝ Երևան, Դեղատան 3 հասցեով, մինչև 2025 թվականի նոյեմբերի 25-ը, ժամը 18։00։
Հայտերի բացման նիստը նախատեսված է նոյեմբերի 26-ին՝ ժամը 16։00-ին, Երևանի Խորենացի 3, 7 հասցեում։

Լրացուցիչ տեղեկությունների համար կարելի է զանգահարել (+374) 10 30 42 91 հեռախոսահամարով կամ գրել [email protected] էլփոստին։