Օվերչուկը հայտնել է Ադրբեջանի տարածքով Հայաստան արտահանումն ընդլայնելու ծրագրերի մասին

Ադրբեջանը միաժամանակ սկսել է իր սեփական արտահանումը Հայաստան։

Ռուսաստանը նախատեսում է Ադրբեջանի տարածքով անցնող երթուղով հացահատիկից բացի Հայաստան մատակարարել այլ ապրանքներ, մասնավորապես՝ պարարտանյութեր, «Ռոսիա 24» հեռուստաալիքի եթերում  հայտնել է ՌԴ փոխվարչապետ Ալեքսեյ Օվերչուկը:

«Վերջերս տեղի ունեցավ շատ կարևոր իրադարձություն. Ադրբեջանի և Վրաստանի տարածքով Հայաստան հասավ ռուսական հացահատիկ տեղափոխող առաջին գնացքը՝ առաջին անգամ ավելի քան 30 տարվա ընթացքում և առաջին անգամ Հայաստանի ու Ադրբեջանի անկախացումից ի վեր։ Նախ ռուսական հացահատիկն էր, ապա՝ ղազախական, ներկայումս քննարկում ենք փոխադրվող բեռների շրջանակի ընդլայնումը, այդ թվում՝ պարարտանյութերի»,- ասել է Օվերչուկը:

Նա նշել է, որ Ադրբեջանը միաժամանակ սկսել է իր սեփական արտահանումը Հայաստան՝ ուղարկելով նավթամթերք տեղափոխող գնացք։

ՌԴ փոխվարչապետի խոսքով՝ Մոսկվան և Երևանը միաժամանակ քննարկում են հակառակ ուղղությամբ՝ Հայաստանից Ռուսաստան Ադրբեջանի տարածքով բեռներ ուղարկելու հնարավորությունը։ «Մենք խոսում ենք երկկողմանի բեռնման միջոցով կայուն լոգիստիկայի զարգացման մասին։ Դրանք զարգացումներ են, որոնք վերջերս անհավանական էին թվում»,- ընդգծել է պաշտոնյան։ Ավելի վաղ հաղորդվել էր, որ Ռուսաստանը նախատեսում է մինչև 2026 թվականի հունվարի վերջը մատակարարել մոտ 132 վագոն ցորեն։

Ընդհանուր առմամբ, Հայաստանը տարեկան ներմուծում է 450000-500000 տոննա հացահատիկ, որը գրեթե ամբողջությամբ ստացվում է Ռուսաստանից։