Հոկտեմբերի 24-ի բիզնես լուրերը

Տեղական

Նոյեմբերի 1-ից Հայաստանում կգործի ոստիկանության գվարդիան
Գվարդիան կզբաղվի հասարակական կարգի պահպանությամբ, պետական օբյեկտների պաշտպանությամբ և հատուկ բեռների ուղեկցմամբ։ Ծառայությունը կունենա նոր համազգեստ և տեխնիկական միջոցներ, իսկ նրա աշխատակիցները կաջակցեն նաև արտակարգ իրավիճակներում և քննությունների իրականացման ընթացքում։

2025-ի օգոստոսին Հայաստանում աշխատողների թիվը կազմել է 794 հազար
Նրանցից 214 հազարը պետական, իսկ շուրջ 580 հազարը՝ մասնավոր հատվածում են աշխատում։ Առևտուրը, կրթությունը և արդյունաբերությունը շարունակում են մնալ ամենաշատ զբաղվածություն ապահովող ոլորտները։

Հակակոռուպցիոն կոմիտեն վերականգնել է ավելի քան 2 մլրդ դրամ պետությանը
Առաջին ինը ամիսների ընթացքում նախաքննվել է 2061 քրեական գործ, վերադարձվել են ապօրինի օտարված 13 հողատարածքներ։ Կոմիտեն արձանագրում է նախորդ տարվա համեմատ գործերի աճ։

Հայաստանում կիրականացվի ջրամբարաշինության 5 նոր նախագիծ
Ծրագրերի արդյունքում կկուտակվի 18 մլն մ³ ջուր, շահառու կլինի շուրջ 700 հազար մարդ։ Նախագծերի ընդհանուր արժեքը գերազանցում է 40 մլրդ դրամը, իսկ ոռոգվող հողատարածքները կմեծանան ավելի քան 6 հազար հեկտարով։

Կեղծ էջերում առաջարկվում է տրանսպորտի տոմսերի կեղծ վաճառք
Երևանի քաղաքապետարանը նախազգուշացնում է քաղաքացիներին չօգտվել նման էջերից։ Տոմսեր կարելի է գնել միայն Telcell Wallet հավելվածով, transport.yerevan.am կայքով կամ Telcell տերմինալներում։

Միջազգային

Ռուսաստանում արգելափակվել են Telegram-ը և WhatsApp-ը
Սահմանափակումները վերաբերում են Ռուսաստանի 34 շրջանների, ընդգրկելով շուրջ 93 մլն բնակչություն։ «Ռոսկոմնադզոր»-ը պնդում է, թե միջոցառումները ուղղված են հանցագործությունների կանխմանը։

Թրամփը դադարեցրել է Կանադայի հետ առևտրային բանակցությունները
ԱՄՆ նախագահը մեղադրել է Կանադային՝ Ռեյգանի մասնակցությամբ կեղծ գովազդ օգտագործելու մեջ։ Թրամփը հայտարարել է, որ Վաշինգտոնը չի վերսկսի բանակցությունները, մինչև Կանադան չհերքի հրապարակումը։

Վրաստան ուղարկվող դրամական փոխանցումները սեպտեմբերին աճել են 12%-ով
Փոխանցումների ընդհանուր ծավալը կազմել է մոտ 318 մլն դոլար, որոնց հիմնական մասը՝ 142 մլն դոլար, ուղարկվել է ԵՄ երկրներից։

Եվրամիությունը հետաձգել է Ռուսաստանի սառեցված ակտիվների օգտագործման որոշումը
Բելգիայի պահանջով ԵՄ-ն չի ընդունել վերջնական որոշում։ ԵՄ առաջնորդները հանձնարարել են Եվրահանձնաժողովին մշակել մի քանի տարբերակ, որոնք կներկայացվեն հաջորդ գագաթնաժողովին։