Հոկտեմբերի 15-ի բիզնես լուրերը

Տեղական

2026-ից առողջության ապահովագրության համակարգում առաջինը կընդգրկվեն 65+ տարիքային քաղաքացիները
Առողջության ապահովագրությունը կգործարկվի 2026-ից՝ նախ ընդգրկելով 65 և բարձր տարիքի անձանց, որոնց վճարումները կկրի պետությունը։ Ապահովագրությունը կտրվի բոլորին՝ անկախ սոցիալական կարգավիճակից կամ առողջական վիճակից։

«Սևան» ազգային պարկի հողերին հասցվել է 33.5 միլիոն դրամ վնաս․ հաղորդում է ներկայացվել ՔԿ
ԲԸՏՄ-ն հայտնաբերել է ոչ կանոնավոր աղբահանության դեպքեր՝ առաջացնելով հողի աղտոտում։ Հաշվարկվել է վնասի չափը, և նյութերը փոխանցվել են Քննչական կոմիտե։

Ժամանակավոր անաշխատունակության և մայրության նպաստների էլեկտրոնային համակարգում հնարավոր են տեխնիկական խափանումներ
ԱՍՀՆ-ն տեղեկացրել է, որ նոր գործարկված համակարգում կարող են առաջանալ տվյալների համադրման խնդիրներ և հորդորել է քաղաքացիներին դիմել 114 թեժ գծով կամ [email protected] հասցեով։

Տեղի է ունեցել ավելի քան 19.4 մլրդ դրամի պետական պարտատոմսերի տեղաբաշխման աճուրդ
Աճուրդում պահանջարկը գերազանցել է առաջարկը՝ կազմելով մոտ 27 մլրդ դրամ։ Տեղաբաշխվել են 30 տարվա մարման ժամկետով պարտատոմսեր՝ ընդհանուր 19.4 մլրդ դրամ ծավալով։

Հուլիսին Հայաստանում գրանցվել է 2839 նոր կազմակերպություն և Ա/Ձ
Նրանց մեծ մասը՝ 1973-ը, անհատ ձեռնարկատերեր են։ Գրանցվել են նաև 798 ՍՊԸ-ներ, մի քանի հասարակական կազմակերպություններ, հիմնադրամներ և ՓԲԸ-ներ։

Միջազգային

Թրամփը սպառնացել է մաքսատուրքեր սահմանել Իսպանիայի դեմ՝ ՆԱՏՕ-ի ծախսերը չբարձրացնելու պատճառով
ԱՄՆ նախագահը քննադատել է Մադրիդին պաշտպանական պարտավորությունները չկատարելու համար՝ հայտարարելով, որ կարող է սահմանել մաքսատուրքեր կամ նույնիսկ վերանայել Իսպանիայի դաշինքում անդամակցությունը։

ԱՄՆ Սենատը 8-րդ անգամ մերժել է կառավարության ֆինանսավորման օրինագիծը
Կոնգրեսը շարունակում է չհասնել համաձայնության՝ կառավարության ֆինանսավորման շուրջ։ Արդյունքում ԱՄՆ-ում շաթդաունը շարունակվում է արդեն երկու շաբաթ։

Ֆրանսիան առաջարկում է սառեցնել կենսաթոշակային բարեփոխումները մինչև 2027թ․
Վարչապետ Սեբաստիան Լեկորնյուն հայտարարել է, որ բարեփոխումները կդադարեցվեն՝ մինչև հաջորդ նախագահական ընտրությունները՝ քաղաքական լարվածությունը նվազեցնելու նպատակով։

Ռուսաստանը հրաժարվում է կատարել ՄԻԵԴ-ի՝ Վրաստանին փոխհատուցում վճարելու որոշումը
Մոսկվան հայտարարել է, որ չի իրականացնի Վրաստանին շուրջ 253 մլն եվրոյի վճարման պահանջը՝ «Վրաստանն ընդդեմ Ռուսաստանի» գործով։