Միջուկային ապագայի որոնում․ ինչ է շահում և ինչ ռիսկեր է կրում Հայաստանը

Նոր միջուկային ռեակտորի կառուցման հարցը դիտարկվում է Հայաստանի էներգետիկ համակարգի երկարաժամկետ զարգացման համատեքստում։

Հայաստանի Հանրապետությունը շարունակում է աշխատանքները նոր միջուկային ռեակտորի կառուցման հարցով՝ համագործակցելով միջուկային տեխնոլոգիաներին տիրապետող մի շարք երկրների հետ։ Այդ մասին Կառավարության նիստից հետո լրագրողների հետ ճեպազրույցի ընթացքում հայտնել է ՀՀ վարչապետ Նիկոլ Փաշինյանը։

Վարչապետի փոխանցմամբ՝ ներկայում քննարկումներ են ընթանում Ֆրանսիայի, ԱՄՆ-ի, Ռուսաստանի, Հարավային Կորեայի և Չինաստանի հետ։ Նրա խոսքով՝ վերջնական որոշումները կընդունվեն այն բանից հետո, երբ հնարավոր բոլոր տեխնիկական, ֆինանսական և անվտանգային հարցերի վերաբերյալ ստացվեն վստահելի պատասխաններ։

Փաշինյանը հիշեցրել է, որ 2025 թվականի օգոստոսի 8-ին Վաշինգտոնում ԱՄՆ նախագահ Դոնալդ Թրամփի հետ ստորագրվել են երեք մտադրությունների հուշագրեր, որոնցից մեկը վերաբերում է էներգետիկ ոլորտին։ Այդ փաստաթուղթը ներառում է նաև միջուկային էներգետիկայի ուղղությունը։

Նոր միջուկային ռեակտորի կառուցման հարցը դիտարկվում է Հայաստանի էներգետիկ համակարգի երկարաժամկետ զարգացման համատեքստում՝ հաշվի առնելով էներգետիկ անվտանգության և հզորությունների պահպանման անհրաժեշտությունը։