«Հյուսիս–հարավ»-ը շատ կարևոր ենթակառուցվածքային նախագիծ է․ ԱԶԲ

Այս նախագիծը կարևոր տեղ է զբաղեցնում Հայաստանի տրանսպորտային ռազմավարության մեջ։

«Հյուսիս–հարավ» ծրագրի բոլոր մանրամասներին լիովին չեմ տիրապետում, սակայն գիտեմ, որ սա շատ կարևոր ենթակառուցվածքային նախագիծ է, և օրինակ՝ Հարավային Կորեան նույնպես մասնակցում է նմանատիպ կապուղիների ստեղծմանը տարածաշրջանում»։ Այս մասին Ասիական զարգացման բանկի 59-րդ տարեկան համաժողովի շրջանակում տեղի ունեցած մամուլի ասուլիսի ժամանակ ասել է ԱԶԲ-ի Կենտրոնական և Արևմտյան Ասիայի գծով գլխավոր տնօրենի տեղակալ Յոնգ Յեն։

«Այս նախագիծը կարևոր տեղ է զբաղեցնում Հայաստանի տրանսպորտային ռազմավարության մեջ։ Այն ֆինանսավորվում է մի շարք միջազգային գործընկերների կողմից և, ըստ էության, հանդիսանում է տրանսպորտային միջանցք, որը կապում է երկրի տարբեր քաղաքներն ու բնակավայրերը՝ նպաստելով մարդկանց և բեռների ազատ տեղաշարժին։ Միաժամանակ, այն կարող է նոր հնարավորություններ ստեղծել մարզերի համար, որոնք մինչ այժմ համեմատաբար պակաս զարգացած են եղել։ Ինչպես նկատվում է, բնակչության մի մասը տեղափոխվում է մեծ քաղաքներ, և նման ծրագրերը կարող են օգնել հավասարակշռել զարգացումը՝ ստեղծելով տնտեսական ակտիվություն նաև մարզերում»,–հավելել է Յոնգ Յեն։

Հարցին, թե ինչ դեր կարող է ունենալ Հյուսիս–հարավ ճանապարհը տարածաշրջանային ինտեգրման տեսանկյունից, ԱԶԲ ներկայացուցիչը պատասխանել է․

«Քանի որ ծրագիրը դեռ ամբողջությամբ ավարտված չէ, դրա իրական ազդեցությունը տեսանելի կլինի ժամանակի ընթացքում։ Սակայն ակնկալվում է, որ բեռնափոխադրումների և ուղևորափոխադրումների ծավալները կաճեն։ Միևնույն ժամանակ, վերջին աշխարհաքաղաքական զարգացումները բացում են նոր հնարավորություններ նաև արևելք–արևմուտք կապերի համար։ Այս բոլոր գործոնները միասին կարող են ձևավորել ավելի լայն տնտեսական ինտեգրում, և հնարավոր է, որ մոտ 5–7 տարվա ընթացքում տնտեսական ազդեցությունը զգալիորեն մեծանա»։

Հիշեցնենք, որ Ուզբեկստանի Սամարկանդ քաղաքում մայիսի 3-6–ը ընթանում է Ասիական զարգացման բանկի 59-րդ տարեկան համաժողովը, որի շրջանակում Սամարկանդում են ԱԶԲ–ի անդամ 69 երկրների ֆինանսական ոլորտի ներկայացուցիչներ, քաղաքականություն մշակողներ, անկախ փորձագետներ, լրագրողներ։