Մակրոտնտեսական կայունությունը դարձել է Հայաստանի այցեքարտը գլոբալ ներդրումային քարտեզի վրա․ ԿԲ նախագահ

Ցածր և կայուն գնաճային միջավայրի ապահովումը պահանջում է նոր մոտեցում։

2020 թվականին, այս ամբիոնից հանդես գալով որպես Հայաստանի Կենտրոնական բանկի նախագահի պաշտոնի թեկնածու, ես հայտարարեցի, որ մեզ շրջապատող աշխարհը դառնում է ավելի ու ավելի անորոշ և մարտահրավերներով լի։ Այս մասին, այսօր՝ մայիսի 5–ին, Ազգային ժողովի նիստում՝ Հայաստանի Կենտրոնական բանկի նախագահի ընտրության հարցի քննարկման ժամանակ հայտարարել է ԿԲ նախագահ ու այդ պաշտոնի թեկնածու Մարտին Գալստյանը։

Նրա խոսքով՝ այդ պահին ստեղծված իրավիճակը մասնավոր դեպք չէր, այլ համաշխարհային տնտեսությունում սկզբունքորեն նոր, ավելի բարդ և ցնցումներով հագեցած շրջանի սկիզբը։ «Ցավոք, վերջին տարիների իրադարձությունների զարգացումը հաստատեց իմ դիտարկումները», - նշել է Գալստյանը։ Միաժամանակ, կառուցվածքային փոփոխությունները՝ արհեստական բանականության և նոր տեխնոլոգիաների ի հայտ գալուց մինչև բնակչության ծերացում և կլիմայի փոփոխություն, էապես մեծացրել են համաշխարհային տնտեսական աճի հեռանկարների շուրջ անորոշությունը։ «Այս բոլոր գործոնների համակցված ազդեցությունը լուրջ փորձություն է տնտեսական քաղաքականության պատասխանատուների համար, ընդ որում՝ համաշխարհային մակարդակում, որը դարձել է ավելի մասնատված, խոցելի և անորոշ», - ասել է Գալստյանը։

ԿԲ նախագահը նշել է, որ Կառավարության հետ համատեղ ձեռնարկված ջանքերի շնորհիվ մակրոտնտեսական կայունությունը դարձել է Հայաստանի այցեքարտը գլոբալ ներդրումային քարտեզի վրա։ «Թեև մեզ հաջողվել է հաղթահարել բազմաթիվ մարտահրավերներ և ապահովել գների կայունություն, մենք հիանալի գիտակցում ենք, որ անորոշ և արագ փոփոխվող աշխարհում ցածր և կայուն գնաճային միջավայրի ապահովումը պահանջում է նոր մոտեցում», - հավելել է Կենտրոնական բանկի նախագահը։