Քննարկվել է պետական համակարգում կատարողականի գնահատման պիլոտային ծրագրի ընթացքը

Հանդիպման ընթացքում քննարկվել են նոր պահանջներին համապատասխան մարդկային ռեսուրսների զարգացման, մասնագիտական կարողությունների բարձրացման և մոտիվացիոն մեխանիզմների մշակմանն ուղղված քայլերը։

Վարչապետ Նիկոլ Փաշինյանի գլխավորությամբ տեղի է ունեցել խորհրդակցություն, որի ընթացքում քննարկվել է հանրային կառավարման բարեփոխումների շրջանակում պետական կառավարման համակարգում կատարողականի գնահատման և դրա հիմքով խրախուսման պիլոտային ծրագրի ընթացքը։

Փոխվարչապետ Տիգրան Խաչատրյանը զեկուցել է պետական կառավարման համակարգի արդյունավետության և մրցունակության բարձրացմանն ուղղված ծրագրի ընթացքի, իրականացված վերլուծությունների արդյունքների վերաբերյալ։

Նա նաև մանրամասներ է ներկայացրել սոցիալական երաշխիքների շրջանակի և ծրագրի շարունակականության ապահովման համար անհրաժեշտ օրենսդրական կարգավորումների մասին։

Հանդիպման ընթացքում քննարկվել են նոր պահանջներին համապատասխան մարդկային ռեսուրսների զարգացման, մասնագիտական կարողությունների բարձրացման և մոտիվացիոն մեխանիզմների մշակմանն ուղղված քայլերը։

Ամփոփելով քննարկումները՝ վարչապետ Նիկոլ Փաշինյանը ընդգծել է, որ ծրագրի արդյունքները պետք է ենթարկվեն շարունակական վերլուծության, իսկ ստացված եզրակացությունները պետք է դառնան պետական կառավարման համակարգում ինստիտուցիոնալ փոփոխությունների հիմք։ Նրա խոսքով՝ նախաձեռնությունը պետք է նպաստի ոչ միայն մրցունակ կադրերի պահպանմանը, այլ նաև նոր մասնագետների ներգրավմանը։