ԿԳՄՍ նախարարն ընդունել է Լոնդոնի համալսարանական քոլեջի՝ «Ակադեմիական քաղաք» ծրագրի շրջանակում Հայաստան այցելած պատվիրակությանը

«Ակադեմիական քաղաքի» կրթական կլաստերի ձևավորմանը նվիրված խորհրդատվական հանդիպումները կշարունակվեն տարվա ընթացքում:

Կրթության, գիտության, մշակույթի և սպորտի նախարար Ժաննա Անդրեասյանն ընդունել է «Ակադեմիական քաղաք» ծրագրի գործընկեր Լոնդոնի համալսարանական քոլեջի (UCL) կրթության ինստիտուտի (IOE) դեկանի տեղակալ Նորբերտ Պախլերին։ Հանդիպմանը մասնակցել են նաև ԿԳՄՍ նախարարի տեղակալ Արաքսիա Սվաջյանը և «Ակադեմիական քաղաք» հիմնադրամի տնօրեն Արմեն Սիմոնյանը։

ԿԳՄՍՆ-ի փոխանցմամբ՝ քննարկման առանցքում եղել են Հայաստանի բարձրագույն կրթության բարեփոխումների համատեքստում մանկավարժական կրթության միջազգային մրցունակության բարձրացման, կրթական բովանդակության արդիականացման և «Ակադեմիական քաղաքի» կրթական կլաստերի ձևավորման գործընթացում UCL-ի խորհրդատվական աջակցության շրջանակում նախատեսվող հետագա քայլերը։

Ժաննա Անդրեասյանը նշել է, որ ոլորտային բուհերի և կազմակերպությունների հետ UCL պատվիրակության հանդիպումները հնարավորություն են տալիս քարտեզագրել մանկավարժական կրթության ոլորտի հնարավորություններն ու խնդիրները և դրանք ներառել կրթական կլաստերի հայեցակարգում։

Նախարարը շեշտել է Կառավարության պատրաստակամությունը՝ իրագործելու բարձրագույն կրթության բարեփոխումների շրջանակը, որը միտված է ինստիտուցիոնալ փոփոխությունների ապահովմանը։ Այդ համատեքստում առանձնացվել է մանկավարժական կրթության որակի բարելավման կարևորությունը՝ հաշվի առնելով դրա ազդեցությունը նախադպրոցական, հանրակրթական, միջին և բարձրագույն մասնագիտական կրթության համակարգերի, ինչպես նաև հանրային կյանքի այլ ոլորտների վրա։

Քննարկվել են նաև մարդկային ռեսուրսների հետ կապված խնդիրները, մասնավորապես՝ մանկավարժական գործունեության գրավչության և մրցունակության բարձրացումը, երիտասարդների ներգրավումը, լավագույն մասնագետների պահպանումը, ինչպես նաև ուսուցիչների մասնագիտական կարողությունների զարգացման և մանկավարժական ուղղությամբ գիտահետազոտական աշխատանքի հնարավորությունների ընդլայնումը։

Ժաննա Անդրեասյանը կարևորել է բուհերի կողմից միջազգային համագործակցության մեխանիզմների արդյունավետ կիրառումը, այդ թվում՝ Բոլոնիայի գործընթացի և Էրազմուս+ ծրագրերի շրջանակում, ինչպես նաև միջազգային փորձագիտական ներուժի և սփյուռքի ներգրավումը։

Նորբերտ Պախլերը ներկայացրել է իր գլխավորած պատվիրակության հայաստանյան այցի ընթացքում պետական բուհերի, Երևանի և մարզերի հանրակրթական դպրոցների, ինչպես նաև ոլորտի շահագրգիռ կառույցների հետ հանդիպումների արդյունքում ձևավորված դիտարկումները։ Նա ընդգծել է ուսանողական փորձառության որակի, դասավանդող անձնակազմի կարողությունների զարգացման, գրավիչ կրթական ծրագրերի և մանկավարժական գիտական գերազանցությունների կենտրոնների ստեղծման նշանակությունը։

Պախլերի խոսքով՝ «Ակադեմիական քաղաքի» կրթական կլաստերի ձևավորմանը նվիրված խորհրդատվական հանդիպումները կշարունակվեն տարվա ընթացքում՝ հետագա աշխատանքների ճանապարհային քարտեզի հստակեցման նպատակով։