Կարմիր սարում հանք բացելու վերաբերյալ հանրային լսումները լարված են անցել

Վեդի համայնքի Գինեվետ գյուղում այսօր՝ հոկտեմբերի 13–ին, տեղի ունեցան նախնական հանրային լսումներ «Օրդ Գրուպ» ՍՊԸ-ի կողմից ներկայացված Կարմիր սարի կրաքարային մերգելների օգտակար հանածոյի արդյունահանման աշխատանքների վերաբերյալ: Ծրագիրը նախատեսում է նաև Ցեմենտի գործարանի կառուցում։ Սա հանրային քննարկումների առաջին փուլն է:

Ըստ նախագծի հեղինակների, նախատեսվում է 25 մլն դրամի ներդրում, որն անհրաժեշտության դեպքում կարող է հասցվել մինչև 35 մլն-ի։

Մինչ այդ բնապահպան ակտիվիստները կոչ էին արել հարակից գյուղերի բնակիչներին գալ և կանխել այն ռիսկերը, որոնցով բաց հանքարդյունաբերությունը սպառնում է գյուղատնտեսությանը, դիմել էին նաև քաղհասարակության ներկայացուցիչներին` կանգնելու իրենց շահերի համար պայքարող գյուղացիների կողքին:

Գյուղի բնակիչներից մեկը հայտնեց, որ այդ տարածքներում էնդեմիկ և կարմիրգրքային բույսեր կան։ Նախաձեռնողը ընթերցեց ԳԱԱ Թախթաջյանի անվան ինստիտուտի  եզրակացությունը, որ հանքի շահագործման տարածքում Կարմիր գրքային բույս չկա։ «Հայաստանի անտառներ» ՀԿ-ի նախագահ Նազելի Վարդանյանը նշեց, որ ՇՄ նախարարությունը  եզրակացություն է տվել, որ այդ հատվածում կարմիր գրքային բույսեր կան։

Երբ քաղհասարակության ներկայացուցիչները դեմ արտահայտվեցին հանքի շահագործմանը, ընկերության ներկայացուցիչները, նաեւ որոշ գյուղացիներ հայտարարեցին, որ նրանք «Վեդի Ալկո» ընկերության շահերի պաշտպանն են։ Ինչ–որ պահի իրավիճակը լարվեց, հնչեցին փոխադարձ վիրավորանքներ։ հանրային լսումների վայրում պարեկները հանդարտեցրին վիճակը։

Վարչական շրջանի ղեկավարության ներկայացուցիչը հանրային լսումները դադարեցրեց՝ նշելով, որ հարցերը կրկնվում են։ Բնապահպան Օլեգ Դուլգարյանը և մյուս ակտիվիստները վանկարկեցին. «Ամոթ, հանրային լսումները չեն կայացել, քանի որ բոլոր հարցերը չեն լսվել և ելույթներ չեն եղել և անօրինական ձևով կասեցվեց»։