Կապանի օդանավակայանը կարող է շահագործվել որպես միջազգային օդանավակայան

Նախատեսվում է նաև ընդլայնել Երևանի «Զվարթնոց» և Գյումրիի «Շիրակ» օդանավակայանների թողունակությունը։

Կապանի «Սյունիք» օդանավակայանը կարող է շահագործվել որպես միջազգային օդանավակայան։ Այս մասին ՀՀ կառավարության նիստում հայտարարել է փոխվարչապետ Մհեր Գրիգորյանը՝ ընդգծելով, որ այդպիսով Հայաստանը կարող է ունենալ երկրորդ միջազգային օդանավակայանը։

Տարածքային կառավարման և ենթակառուցվածքների փոխնախարար Արմեն Սիմոնյանի խոսքով՝ Կապանի օդանավակայանի դեպքում ստեղծվում է համապատասխան իրավական հիմք, քանի որ այն դուրս է գործող կոնցեսիոն սահմանափակումներից։

«Գործող կոնցեսիոն պայմանագրով սահմանված է, որ «Զվարթնոց» օդանավակայանից 250 կմ շառավղով հեռավորության վրա, եթե կառավարությունը որոշում է որևէ օդանավակայան փոխակերպել քաղաքացիական, տեղական կամ միջազգային օդանավակայանի, ապա գործող կոնցեսիոնը ստանում է կառավարման առաջնահերթ իրավունք։ Սակայն այս պարագայում Կապանի «Սյունիք» օդանավակայանը դուրս է գալիս այդ կարգավորումից», – նշել է Սիմոնյանը։

Նրա խոսքով՝ Կապանի օդանավակայանը միջազգային կարգավիճակ ստանալու համար անհրաժեշտ կլինի իրականացնել համապատասխան ներդրումներ և տեխնիկական վերազինում՝ ապահովելու սահմանային, մաքսային և այլ պարտադիր գործառույթների իրականացումը։

Կառավարության որոշմամբ նախատեսվում է նաև ընդլայնել Երևանի «Զվարթնոց» և Գյումրիի «Շիրակ» օդանավակայանների թողունակությունը։ Այդ նպատակով ծրագրվում է իրականացնել շուրջ 425 միլիոն ԱՄՆ դոլարի կապիտալ ներդրում։