Ստամբուլում կրկին արգելվել է ապրիլի 24-ի հիշատակի միջոցառումը

Վերջին տարիներին նման դիմումները պարբերաբար մերժվում են:

Ստամբուլի իշխանությունները կրկին չեն թույլատրել Հայոց ցեղասպանության զոհերի հիշատակի միջոցառման անցկացումը։

Agos-ի փոխանցմամբ՝ «Ապրիլի 24-ի հիշատակի հարթակը» դիմել էր նահանգապետարան՝ Քադըքյոյում հավաք անցկացնելու թույլտվություն ստանալու համար, սակայն դիմումը մերժվել է։

Խոսքը վերաբերում էր Սյուրեյյա օպերայի շենքի դիմաց նախատեսված միջոցառմանը, որը պետք է անցկացվեր ապրիլի 24-ին՝ ժամը 19:00-ին։

Կազմակերպիչները նշել են, որ վերջին տարիներին նման դիմումները պարբերաբար մերժվում են, մինչդեռ մինչև համավարակը հիշատակի միջոցառումները անցկացվում էին տարբեր քաղաքներում, հատկապես Ստամբուլում։

Նրանք ընդգծել են, որ հիշատակի հավաքների անցկացումը ժողովրդավարական իրավունք է և կոչ են արել վերանայել որոշումը։

Հայտարարության մեջ նաև նշվում է, որ միջոցառումները նպատակ ունեն հարգանքի տուրք մատուցել 1915 թվականի զոհերի հիշատակին և նպաստել հասարակական հիշողության պահպանմանը։