Իրանի սպառնալիքների հետևանքները․ Հայաստանի Ամերիկյան համալսարանը դադարեցրել է օֆլայն դասերը

Թեհրանը սպառնացել էր հարվածներ հասցնել տարածաշրջանում գտնվող իսրայելական և ամերիկյան համալսարաններին։

Հայաստանի Ամերիկյան Համալսարանը (ՀԱՀ) դադարեցրել է առկա դասընթացները և անցել է առցանց ուսուցման՝ Իրանի կողմից տարածաշրջանում ԱՄՆ-ի հետ կապված համալսարանների նկատմամբ սպառնալիքների ֆոնին:

Համասլարանի տարածած հայտարարության մեջ նշվում է. «Խնդրում ենք ի գիտություն ընդունել, որ ելնելով անվտանգության նկատառումներից և հաշվի առնելով Արևմտյան Ասիայի ու Մերձավոր Արևելքի ամերիկյան համալսարանների թիրախավորման վերաբերյալ Իրանի կողմից հնչեցված սպառնալիքները,երկուշաբթի՝ մարտի 30-ին, բոլոր դասերը կանցկացվեն առցանց ձևաչափով։ Նշենք, որ սա պարզապես նախազգուշական միջոցառում է: Համալսարանը ուշադիր հետևում է իրավիճակին և կտեղեկացնի ժամանակացույցի կամ ուսուցման ձևաչափի ցանկացած փոփոխության մասին։ 

Ցանկանում ենք ընդգծել, որ մեր համալսարանի նկատմամբ որևէ ուղղակի սպառնալիք չի արձանագրվել, և առկա չեն հիմքեր համալսարանի՝ վտանգի մեջ գտնվելու վերաբերյալ, ուստի խուճապի պատճառ չկա։

Հարգելի՛ ՀԱՀ համայնքի անդամներ, խնդրում ենք պարբերաբար ստուգել ձեր էլեկտրոնային փոստերը և վերջին թարմացումների համար հիմնվել բացառապես համալսարանի պաշտոնական հաղորդագրությունների վրա»։

Հիշեցնենք, որ Թեհրանը սպառնացել էր հարվածներ հասցնել տարածաշրջանում գտնվող իսրայելական և ամերիկյան համալսարաններին՝ ի պատասխան իրանական երկու բուհերի ռմբակոծության։ Իսլամական հեղափոխության պահապանների կորպուսը (ԻՀՊԿ) ԱՄՆ-ին ժամանակ էր տվել իրականացված հարձակումները դատապարտելու համար։ Եթե ԱՄՆ վարչակազմը ցանկանում է զերծ պահել տարածաշրջանում գտնվող իր համալսարանները պատասխան միջոցներից, ապա պետք է մինչև մարտի 30-ը (Թեհրանի ժամանակով կեսօրը), դատապարտի բուհերի ռմբակոծությունները։ Այս մասին հայտնում է Fars գործակալությունը՝ հղում անելով X սոցիալական ցանցում ԻՀՊԿ-ի տարածած հայտարարությանը։