Ինչպես են տեխնոհսկաները բաշխում ԱԲ բումի ռիսկերը․ միլիարդանոց տվյալների կենտրոնները՝ ուրիշների հաշվեկշռում

The New York Times-ի վերլուծությունը ցույց է տալիս, որ արհեստական բանականության շուրջ ձևավորված գլոբալ բումը ստիպում է տեխնոլոգիական հսկաներին վերանայել իրենց ֆինանսական ռազմավարությունը։

Տվյալների կենտրոնների կառուցումը, որը կարող է արժենալ տասնյակ միլիարդավոր դոլարներ, հետևողականորեն իրականացվում է ոչ թե սեփական հաշվեկշռով, այլ բարդ գործարքների միջոցով։ Microsoft-ն այս աշնանը կնքել է բազմամիլիարդանոց պայմանագրեր՝ հաշվարկային հզորություններ վարձակալելու համար, Meta-ն՝ գրեթե 30 միլիարդ դոլար ֆինանսավորում է ապահովել Լուիզիանայում տվյալների հսկայական կենտրոն կառուցելու համար՝ առանց պարտքը սեփական ուսերին վերցնելու, իսկ Google-ը որոշել է հաշվարկային հզորություններ վարձել փոքր ընկերությունից և դրանց մի մասը վերավաճառել OpenAI-ին։

Այս գործարքները մի ընդհանուր նպատակ ունեն․ նվազեցնել տեխնոհսկաների ֆինանսական պատասխանատվությունը և ռիսկը մի ոլորտում, որտեղ ապագա պահանջարկը դեռևս լիովին կանխատեսելի չէ։ Մինչ Meta-ն, Microsoft-ը կամ Google-ը արագորեն ավելացնում են հաշվարկային հզորությունները և սպասում՝ տեսնելու, թե ինչպես կձևավորվի ԱԲ-ի իրական պահանջարկը, ռիսկը տեղափոխվում է փոքր ընկերությունների և նրանց վարկատուների վրա։ Արդյունքում, եթե մի քանի տարի անց պարզվի, որ այդքան մեծ հաշվարկային ենթակառուցվածք անհրաժեշտ չէ, հետևանքները կարող են մնալ ոչ թե տեխնոհսկաների, այլ քիչ հայտնի տվյալների կենտրոնների օպերատորների և ֆինանսավորողների վրա։