Ինչ ընթացակարգով են ֆիզիկական և իրավաբանական անձինք ծանուցումներ ստանալու․ Էլեկտրոնային տարբերակից մինչև առաքանի

Թե որն է լինելու ծանուցման հարթակը, որ կայքում է գործելու պաշտոնական էլեկտրոնային փոստը և այլ մանրամասներ, սահմանվելու են կառավարության որոշմամբ:

Պետությունը փորձում է լուծել պատշաճ ծանուցումների խնդիրը. քաղաքացիներին ծանուցումների համար կգործի էլեկտրոնային հարթակ, հարթակ մուտք գործելուց հետո նա կհամարվի պատշաճ ծանուցված, 3 օրվա ընթացքում մուտք չգործելու դեպքում ծանուցումը կուղարկվի առաքանու միջոցով, սա ևս չստանալու դեպքում այն կտեղադրվի Azdarar.am հարթակում, տեղադրվելուց հետո 7-րդ օրը քաղաքացին կհամարվի պատշաճ ծանուցված: 

«Ինտերնետով հրապարակային և անհատական ծանուցման մասին» օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթն ԱԺ նիստում ներկայացրեց ՀՀ արդարադատության նախարար Սրբուհի Գալյանը: 

Նախարարի խոսքով՝ այս փաթեթով լուծվում է պատշաճ ծանուցումների իրականացման խնդիրը: Այժմ հատկապես պետություն-քաղաքացի հարաբերություններում անձինք չեն կարողանում ծանուցվել պատշաճ, քանի որ ներկա պահին Հայաստանում չի գործում էլեկտրոնային ծանուցումների միասնական համակարգը: 

«Ֆիզիկական անձանց պարագայում գործելու է էլեկտրոնային հարթակ, որտեղ անձը մուտք է գործելու խիստ նույնականացման միջոցով, այսինքն՝ նույնականացման քարտի կամ բջջային նույնականացման միջոցով: Ծանուցումը տեղադրվելու է այդ հարթակում: Եվ, եթե անձը մուտք գործի այդ հարթակ, ապա համարվելու է ծանուցված: Անձը կարող է նաև տրամադրել իր հավելյալ կապի միջոցները՝ անձնական էլեկտրոնային փոստ, հեռախոսահամար, որով նա հավելյալ կտեղեկացվի այն մասին, որ հարթակում ծանուցում է տեղադրվել: Եթե հարթակում ծանուցումը տեղադրելուց հետո 3 օրվա ընթացքում անձը մուտք չգործի համակարգ, ապա սկսելու է աշխատել հաջորդ քայլը՝ ծանուցումը հիբրիդային առաքանու միջոցով, պատվիրված նամակով ուղարկվելու է անձի հաշվառման հասցեով: Հիբրիդային առաքանին այն է, երբ ծանուցվողը որևէ ծրար կամ նամակ չի ուղարկում, այլ էլեկտրոնային ծանուցումն ավտոմատ փոխանցվում է փոստին, փոստն այն ծրարավորում է և ուղարկում անձի հաշվառման հասցեով»,-ասաց Գալյանը: 

Եթե այդ եղանակով ուղարկելուց հետո 7-րդ օրվա դրությամբ ֆիքսվում է, որ անձը չի ստացել ծանուցումը կամ հրաժարվել է ստանալ, ապա ծանուցումը տեղադրվում է azdarar.am հարթակում: Այսինքն՝ իրականացվում է հրապարակային ծանուցում: Այս հարթակում տեղադրելուց հետո 7-րդ օրը անձը համարվում է պատշաճ ծանուցված: Եթե ֆիզիկական անձը հարթակի միջոցով տվել է համաձայնություն, որով հավաստում է, որ իրեն բացառապես էլեկտրոնային եղանակով ծանուցումներ կարող են ուղարկվել, ապա ծանուցումներն իրականացվելու են բացառապես էլեկտրոնային եղանակով: Այդ դեպքում ծանուցումը տեղադրելուց հետո 3-րդ օրը անձը համարվելու է պատշաճ ծանուցված՝ անկախ այն հանգամանքից, թե անձը մուտք է գործել տվյալ հարթակ, թե ոչ:

Գալյանի խոսքով՝ իրավաբանական անձանց և անհատ ձեռնարկատերերի դեպքում ծանուցման համար օգտագործվելու է հարկային մարմնի հաշվետվությունների ներկայացման էլեկտրոնային կառավարման համակարգը: Նրանք պատշաճ ծանուցվելու են՝ ծանուցումը ՊԵԿ համակարգի իրենց անձնական էջում տեղադրվելու օրվան հաջորդող երրորդ օրվանից: Եթե նրանք այդ ընթացքում մուտք չգործեն համակարգ, ապա ծանուցումը միանգամից տեղադրվելու է Azdarar.am կայքում, տեղադրվելուց հետո 5-րդ օրը համարվելու են պատշաճ ծանուցված:

Թե որն է լինելու ծանուցման հարթակը, որ կայքում է գործելու պաշտոնական էլեկտրոնային փոստը և այլ մանրամասներ, սահմանվելու են կառավարության որոշմամբ: