Հրազդանի կիրճում կկառուցվի բազմաֆունկցիոնալ հանգստի գոտի. որքան բյուջե է նախատեսված

Նախատեսվում է նաև բարելավել տարածքի տրանսպորտային և հետիոտնային ենթակառուցվածքները:

Երևանի Հրազդանի կիրճի սկզբնամասից մոտ 5.5 կմ հատվածում նախատեսվում է կառուցել բազմաֆունկցիոնալ հանգստի գոտի։ Ծրագրի իրականացման համար կհատկացվի 172.6 մլն դրամ։

Ծրագրով նախատեսվում է ստեղծել զբոսայգի, հանգստի գոտիներ, սպորտային և միջոցառումների անցկացման հարթակներ, ինչպես նաև բացօթյա կինոդիտման տարածքներ։

Նախատեսվում է նաև բարելավել տարածքի տրանսպորտային և հետիոտնային ենթակառուցվածքները՝ բարձրացնելով կիրճի հասանելիությունն ու անվտանգությունը։

Քաղաքապետարանի տվյալներով՝ նախագիծը Հրազդանի կիրճի վերակազմակերպման ընդհանուր ծրագրի մաս է։ Հայեցակարգը մշակվել է Ասիական զարգացման բանկի գործընկերների աջակցությամբ։

Բացի այդ, նախատեսվում են լրացուցիչ նախագծեր, այդ թվում՝ քայլուղու և հեծանվուղու կառուցում, որոնց իրականացմանը կարող են ներգրավվել նաև մասնավոր ներդրողներ։

Նախագիծը հաստատվել է Երևանի ավագանու կողմից։