Պատմական առաջընթաց. ԱՄՆ դեսպանատունը՝ Կարսում հայ-թուրքական հանդիպման մասին

Նման զարգացումների հիմքերը դրվել էին օգոստոսի 8-ին Վաշինգտոնում կայացած գագաթնաժողովի ընթացքում։

ՀՀ-ում ԱՄՆ դեսպանությունն անդրադարձել է Կարսում տեղի ունեցած հայ և թուրք պաշտոնյաների հանդիպմանը՝ այն գնահատելով որպես կարևոր քայլ տարածաշրջանային խաղաղության և կայունության ուղղությամբ։

Դեսպանության հաղորդագրության մեջ նշվում է, որ հանդիպման շրջանակում ձևավորվել է Կարս-Գյումրի երկաթգծի վերակառուցման հարցերով համատեղ աշխատանքային խումբ։

«Պատմական առաջընթաց` խաղաղ ու բարգավաճ Հարավային Կովկասի կերտման ճանապարհին»,- նշված է հայտարարության մեջ։

Դիվանագիտական ներկայացուցչության գնահատմամբ՝ Հայաստանի և Թուրքիայի միջև այս առանցքային տրանսպորտային կապի վերականգնումը կարևոր նշանակություն ունի տարածաշրջանային հաղորդակցությունների բացման և կայունության ամրապնդման համար։

Միևնույն ժամանակ ընդգծվում է, որ նման զարգացումների հիմքերը դրվել էին օգոստոսի 8-ին Վաշինգտոնում կայացած գագաթնաժողովի ընթացքում։

ԱՄՆ դեսպանությունը ողջունել է երկու երկրների միջև երկար տարիներ փակված տնտեսական և հասարակական կապերի վերականգնմանն ուղղված գործնական քայլերը։