ՀՀ համայնքների թիվը 70-ից կդառնա 64․ նոր որոշում

Կառավարությունը մարտի 12-ի նիստում քննարկել է համայնքների խոշորացման վերաբերյալ նախագիծը։

ՏԿԵ նախարար Դավիթ Խուդաթյանը հայտնել է, որ առաջարկվում է միավորել 9 համայնք՝ 80 բնակավայրով, և ձևավորել 3 խոշորացված համայնք երեք մարզերում։

Խոշորացված համայնքներն են․

• Ստեփանավան համայնք (Լոռու մարզ)՝ ներառելով ներկայիս Ստեփանավան, Գյուլագարակ և Լոռի բերդ համայնքները (ընդհանուր՝ 20 բնակավայր),

• Գորիս համայնք (Սյունիքի մարզ)՝ ներառելով Գորիս, Տաթև և Տեղ համայնքները (ընդհանուր՝ 28 բնակավայր),

• Եղեգնաձոր համայնք (Վայոց ձորի մարզ)՝ ներառելով Եղեգնաձոր, Արենի և Եղեգիս համայնքները (ընդհանուր՝ 32 բնակավայր)։

Փոփոխությունից հետո ՀՀ համայնքների ընդհանուր թիվը 70-ի փոխարեն կդառնա 64։

Վարչապետ Նիկոլ Փաշինյանը նշել է, որ նախկինում իրականացված խոշորացման որևէ դեպք չի եղել, որի վերաբերյալ հետագայում կարծիք հնչի, թե այն պետք չէր իրականացնել։

«Խոշորացված համայնքների սուբվենցիոն կարողություններն էականորեն մեծանում են։ Ընտանիքը մեծանում է, կարիքները մեծանում են, բայց նաև աշխատող ձեռքերն են շատանում, գույքահարկ վճարողի պոտենցիալն է մեծանում»,- ասել է վարչապետը։

Նրա խոսքով՝ խոշորացման արդյունքում որևէ գյուղ չի կորցրել իր անունը կամ ինքնությունը, իսկ կառավարությանը ևս ավելի հեշտ է աշխատել սահմանափակ թվով համայնքների ղեկավարների հետ։