Հայաստանյան քաղաքական դաշտում երկու օրակարգ կա․ ԱԺ նախագահ

Նրա խոսքով՝ խոսքը ոչ թե անձերի, այլ քաղաքական տեսլականի և դիրքորոշումների մասին է։

Հայաստանի քաղաքական դաշտում առկա են երկու հիմնական օրակարգեր՝ խաղաղության և պատերազմի։ Այս մասին հայտարարել է ԱԺ նախագահ Ալեն Սիմոնյանը՝ խորհրդարանական ճեպազրույցի ժամանակ։

Նրա խոսքով՝ խոսքը ոչ թե անձերի, այլ քաղաքական տեսլականի և դիրքորոշումների մասին է։

«Մեկը պահանջներ հարևանների նկատմամբ է, մյուսը՝ տարածաշրջանում խաղաղություն հաստատելը»,- նշել է Սիմոնյանը։

Անդրադառնալով վարչապետ Նիկոլ Փաշինյանի հայտարարությանը՝ ըստ որի, «Քաղաքացիական պայմանագրի» կողմից սահմանադրական մեծամասնություն չձևավորելու դեպքում կարող է պատերազմ լինել, Սիմոնյանը նշել է, որ դա քաղաքական գնահատական է։

Նա նաև հավելել է, որ նման տեսակետներ նախկինում ևս հնչել են՝ այդ թվում ընդդիմադիրների կողմից։

Լրագրողի հարցին՝ արդյոք պայմանավորվածություններն առնչվում են անձամբ Նիկոլ Փաշինյանին, Սիմոնյանը պատասխանել է, որ կարելի է դա դիտարկել նաև այդ կերպ՝ ընդգծելով, որ ինքը դեմ չէ Փաշինյանին «խաղաղության խորհրդանիշ» համարելուն։

ԱԺ նախագահի խոսքով՝ հասարակության մեջ առկա է ակնկալիք, որ խաղաղության գործընթացը կշարունակվի։

Նա նշել է, որ իշխանությունն էլ իր հերթին կարևորում է այդ ուղղությամբ առաջընթացը և կոչ է անում «տեր կանգնել խաղաղությանը»։