Հայաստանը կունենա նոր կենսաչափական անձնագիր․ հայտնի է դիզայնն ու ներդրման ժամկետը

Վարչապետի խոսքով՝ նոր անձնագիրը «արտացոլում է մեր ինքնությունը, պատմամշակութային ժառանգությունը և պետականությունը»։

ՀՀ վարչապետ Նիկոլ Փաշինյանը ներկայացրել է նոր կենսաչափական անձնագրի նախագիծը՝ հրապարակելով տեսանյութ ՆԳ նախարար Արփինե Սարգսյանի մասնակցությամբ։

Վարչապետի խոսքով՝ նոր անձնագիրը «արտացոլում է մեր ինքնությունը, պատմամշակութային ժառանգությունը և պետականությունը»։

Նշվել է, որ նոր նմուշի կենսաչափական անձնագրերն ու նույնականացման քարտերը շրջանառության մեջ կմտնեն 2026 թվականի աշնանից։

ՆԳ նախարար Արփինե Սարգսյանի խոսքով՝ գործող համակարգը չի համապատասխանել միջազգային չափանիշներին։

«Մեր նպատակն է փաստաթղթերը համապատասխանեցնել ICAO-ի 9303 միջազգային ստանդարտին, որպեսզի դրանք լինեն տեխնոլոգիապես արդիական և ճանաչելի սահմաններում»,- նշել է նա։

Նախարարի խոսքով՝ նոր համակարգը կբարձրացնի քաղաքացիների շարժունակությունն ու կդյուրացնի սահմանային գործընթացները։

Վարչապետ Փաշինյանն ընդգծել է, որ նախաձեռնությունը կարևոր է նաև Եվրամիության հետ վիզաների ազատականացման գործընթացի համար։

Նա նշել է, որ նպատակն է հասնել նրան, որ ՀՀ քաղաքացիները գործնականում առանց վիզայի կարողանան ճանապարհորդել ԵՄ երկրներ։

Նոր կենսաչափական անձնագիրը կունենա կարմիր գույն, որը, ըստ վարչապետի, միջազգային պրակտիկայում լայն տարածում ունի։