Կառավարությունը գնահատում է ՀԷՑ-ի շուկայական արժեքը՝ հնարավոր պետականացման նպատակով

Իրավիճակի վերաբերյալ արդեն իրազեկվել են միջազգային գործընկերները։

Այս պահին իրականացվում է «Հայաստանի էլեկտրական ցանցեր» ընկերության (ՀԷՑ) շուկայական արժեքի գնահատում։ Այդ մասին Կառավարության ճեպազրույցի ընթացքում հայտնել է ՀՀ վարչապետ Նիկոլ Փաշինյանը։

Վարչապետի խոսքով՝ եթե գնահատման արդյունքում պարզվի, որ ՀԷՑ-ի շուկայական արժեքը հասանելի է պետական բյուջեի համար, ապա ընկերությունը կարող է ամբողջությամբ պետականացվել։ Այդ դեպքում կառավարությունը նախատեսում է ՀԷՑ-ի կառավարումը հանձնել հավատարմագրված միջազգային բարձր պրոֆեսիոնալ կառավարման ընկերության կամ ընկերությունների խմբի։

Փաշինյանը նշել է, որ իրավիճակի վերաբերյալ արդեն իրազեկվել են միջազգային գործընկերները, մասնավորապես՝ էներգետիկ ոլորտի խոշոր ընկերությունները։

Միաժամանակ վարչապետը նշել է, որ քննարկվում են նաև այլ նախնական սցենարներ։ Նրա խոսքով՝ հնարավոր է, որ ՀԷՑ-ի ֆինանսական վիճակը և շուկայական արժեքը լինեն այնքան ցածր, որ կառավարությունը կարողանա պարզապես որոշմամբ անհրաժեշտ ֆինանսավորում հատկացնել և լուծել կառավարման հարցը՝ առանց շտապ քայլերի։

«Մեծ հաշվով շտապելու բան չունենք։ ՀԷՑ-ն այս պահին առնվազն դե ֆակտո պատկանում է Հայաստանի Հանրապետությանը»,- ասել է վարչապետը։

Այս համատեքստում Փաշինյանը անդրադարձել է նաև ընկերության գործունեության մեջ արձանագրված փոփոխություններին՝ նշելով, որ էականորեն բարձրացել են արդյունավետությունն ու թափանցիկությունը։ Նրա խոսքով՝ նախկինում ՀԷՑ-ի մրցույթներին հիմնականում մասնակցում էին նախկին կառավարիչների հետ կապ ունեցող ընկերություններ, ինչը, ըստ կառավարության գնահատման, ձևավորել էր կոռուպցիոն և փողերի լվացման մեխանիզմներ։ Վարչապետը տեղեկացրել է, որ այդ գործելակերպերի վերաբերյալ հարուցված են քրեական գործեր։