Եվրամիությունը ԱՄՆ-ի նկատմամբ 93 մլրդ եվրոյի պատասխան մաքսատուրքեր է նախապատրաստում

Բրյուսելում կկայանա ԵՄ անդամ երկրների ղեկավարների արտահերթ գագաթնաժողով։

Եվրոպական միությունը ծրագրում է հակազդող մաքսատուրքեր սահմանել ԱՄՆ-ի նկատմամբ կամ սահմանափակել ամերիկյան ընկերությունների գործունեությունը ԵՄ տարածքում, եթե Վաշինգտոնը 10 տոկոսանոց մաքսատուրքեր սահմանի եվրոպական մի շարք երկրների դեմ՝ Գրենլանդիայի հարցում նրանց դիրքորոշման պատճառով։ Այս մասին հայտնում են Der Spiegel-ը և Reuters-ը՝ հղում անելով իրենց աղբյուրներին։

Եվրոպական խորհրդի նախագահ Անտոնիու Կոշտայի խոսքով՝ առաջիկա օրերին Բրյուսելում կկայանա ԵՄ անդամ երկրների ղեկավարների արտահերթ գագաթնաժողով, որի նպատակն է մշակել միասնական պատասխան ԱՄՆ-ի կողմից հնչող սպառնալիքներին։ Reuters-ի տվյալներով՝ գագաթնաժողովը նախատեսված է հունվարի 22-ին։

ERR-ի հաղորդմամբ՝ հնարավոր սցենարներից մեկի համաձայն, ԵՄ-ն կարող է հակազդող մաքսատուրքեր սահմանել ամերիկյան մի շարք ապրանքների նկատմամբ, այդ թվում՝ վիսկիի, ինքնաթիռների պահեստամասերի, սոյայի, թռչնամսի և այլ ապրանքների։ Ընդհանուր ծավալը կարող է հասնել շուրջ 93 միլիարդ եվրոյի, իսկ միջոցները կարող են ուժի մեջ մտնել ավտոմատ մեխանիզմով։

Ավելի վաղ հայտնի էր դարձել նաև, որ ԵՄ-ի և ԱՄՆ-ի միջև տրանսատլանտյան առևտրային համաձայնագիրը չի ստանա Եվրամիության օրենսդիրների հաստատումը՝ ԱՄՆ նախագահ Դոնալդ Թրամփի հայտարարություններից հետո։ Վերջինս սպառնացել էր 10 տոկոսանոց մաքսատուրքեր սահմանել Մեծ Բրիտանիայի, Գերմանիայի, Դանիայի, Նիդերլանդների, Նորվեգիայի, Ֆինլանդիայի, Ֆրանսիայի և Շվեդիայի դեմ։

Նշենք, որ չկայացած համաձայնագիրը նախատեսում էր ԵՄ ներմուծման վրա ԱՄՆ-ի կողմից 15 տոկոս սակագների սահմանում՝ փոխարենը ԵՄ-ի կողմից ամերիկյան արտահանման նկատմամբ մաքսատուրքերի չեղարկման։