Եվրամիության բնակչությունը կարող է նվազել մոտ 53 մլն-ով մինչև 2100 թվականը

Ժողովրդագրական փոփոխությունները արդեն նկատելի են առանձին երկրներում։

Եվրոստատի կանխատեսմամբ՝ մինչև 2100 թվականը Եվրամիության բնակչությունը կարող է կրճատվել 11.7%-ով կամ մոտ 53 միլիոն մարդով։

Ըստ գնահատականների՝ ԵՄ բնակչությունը մինչև 2029 թվականը կաճի սահմանափակ տեմպերով՝ հասնելով շուրջ 453 միլիոնի, որից հետո կսկսվի երկարաժամկետ նվազում։ Դարավերջին բնակչության թիվը կարող է իջնել 400 միլիոնից ցածր։

Միաժամանակ փոխվում է բնակչության կառուցվածքը․ նվազում է երիտասարդ և աշխատանքային տարիքի բնակչության թիվը, իսկ 80 տարեկանից բարձրների բաժինը կրկնապատկվում է։

Հիմնական գործոններից է ծնելիության ցածր մակարդակը, որը կազմում է միջինը մոտ 1.3 երեխա մեկ կնոջ հաշվով՝ զգալիորեն ցածր բնակչության վերարտադրության շեմից։

Ժողովրդագրական փոփոխությունները արդեն նկատելի են առանձին երկրներում։ Ֆրանսիայում, օրինակ, մինչև 2035 թվականը դպրոցականների թիվը կարող է նվազել ավելի քան 1.5 միլիոնով, իսկ 2025 թվականին մահացության մակարդակը առաջին անգամ կարող է գերազանցել ծնելիությանը Երկրորդ համաշխարհային պատերազմից հետո։

Ներկայացված միտումները ցույց են տալիս, որ ԵՄ երկրները բախվում են աշխատուժի կրճատման և բնակչության ծերացման խնդիրներին, ինչը կարող է ազդել սոցիալական համակարգերի և տնտեսական աճի վրա։