Եվրոպական ֆոնդային ինդեքսները նվազել են

Շուկայական տրամադրությունների վրա առանցքային ազդեցություն է ունեցել Մերձավոր Արևելքում տիրող իրավիճակը։

Չորեքշաբթի օրվա առևտրային նստաշրջանի արդյունքներով եվրոպական հիմնական ֆոնդային ինդեքսները արձանագրել են անկում։ Stoxx Europe 600 համախառն ինդեքսը նվազել է 0,60%-ով՝ հասնելով 602,96 կետի։ Բացասական դինամիկա է գրանցվել նաև ազգային ցուցանիշներում. բրիտանական FTSE 100-ը կորցրել է 1,16%, իսկ իսպանական IBEX 35-ը՝ 0,74%։

Շուկայական տրամադրությունների վրա առանցքային ազդեցություն է ունեցել Մերձավոր Արևելքում տիրող իրավիճակը։ Ամերիկա-իրանական բանակցությունների փակուղին և Օրմուզի նեղուցի շրջափակումը հանգեցրել են նավթի գների թանկացմանը, ինչը մեծացնում է գնաճի արագացման ռիսկերը։ Զուգահեռաբար, Իսպանիայում ապրիլյան գնաճը հասել է տարեկան 3,5%-ի՝ գերազանցելով ԵԿԲ-ի թիրախային ցուցանիշը, իսկ եվրագոտում բիզնեսի և սպառողական վստահության ինդեքսը նվազել է մինչև 93 կետ։

Ներդրողները սպասողական վիճակում են ԱՄՆ Դաշնային պահուստային համակարգի, Եվրոպական կենտրոնական բանկի և Անգլիայի բանկի նիստերի որոշումների նախաշեմին։ Չնայած կորպորատիվ հատվածում Mercedes-Benz-ի և դեղագործական հսկաների (GSK, AstraZeneca) բացասական դինամիկային, դրական ցուցանիշներ են արձանագրել adidas-ը (+8,4%) և Airbus-ը (+5,1%)՝ խոշոր պատվերների և սպասվածից բարձր շահույթի շնորհիվ։