ԵՄ երկրները 2025-ին 4,8 մլրդ եվրո են հատկացրել Ուկրաինայի PURL ծրագրին

Մի շարք երկրներ ոչ միայն կատարում են պարտավորությունները, այլև գերազանցում դրանք։

Եվրամիության երկրները 2025 թվականին 4,8 միլիարդ եվրո են հատկացրել Ուկրաինայի համար առաջնահերթ պահանջների ցանկի (PURL) ծրագրին, որը նախատեսում է Կիևի համար զենքի ձեռքբերում ԱՄՆ-ից։ Այս մասին «ՌԲԿ-Ուկրաինա»-ին տված հարցազրույցում հայտնել է Ուկրաինայի նախագահի գրասենյակի ղեկավարի տեղակալ Իգոր Ժովկվան։

Նրա խոսքով՝ Ուկրաինան ունի 28 անվտանգության համաձայնագիր, որոնց մեծ մասը նախատեսում է ռազմական օգնության հստակ չափեր 10-ամյա ժամկետում։ Ժովկվան նշել է, որ մի շարք երկրներ ոչ միայն կատարում են պարտավորությունները, այլև գերազանցում դրանք։

«Գերմանիան, որն ունի 8 միլիարդ եվրոյի պարտավորություն, միայն այս տարվա համար հաստատել է 11,5 միլիարդ եվրոյի բյուջե և իրականացնում է այն», — ասել է նա։

Ժովկվայի խոսքով՝ օգնությունը տրամադրվում է երեք հիմնական ուղղությամբ՝

  • ուղիղ ռազմական աջակցություն,

  • համատեղ արտադրության համաֆինանսավորում,

  • ներդրումներ PURL ծրագրում։

Նա նշել է, որ փետրվարին Ուկրաինան արդեն ստացել է 584 միլիոն եվրո։ Ծրագրին առաջին անգամ միացել է Մեծ Բրիտանիան՝ հատկացնելով 200 միլիոն եվրո։ Ներդրումներ են կատարել նաև Նորվեգիան, Նիդեռլանդները, Շվեդիան, Իսլանդիան և Լատվիան։

Ժովկվան ընդգծել է, որ այժմ օգնությունը տրամադրվում է բացառապես Ուկրաինայի ներկայացրած կոնկրետ պահանջների հիման վրա։

«Մենք հեռացել ենք այն ձևաչափից, երբ մեզ տալիս էին այն, ինչ կարող էին։ Այժմ հստակ նշվում է, թե ինչ է անհրաժեշտ Ուկրաինային», — նշել է նա։

Պաշտոնյայի խոսքով՝ ներկայում առաջնահերթությունը տրվում է հակաօդային պաշտպանությանը, հրթիռներին և անօդաչու թռչող սարքերին, քանի որ պատերազմը հիմնականում ընթանում է օդային և անօդաչու տեխնոլոգիաների կիրառմամբ։

Նա նաև նշել է, որ եթե Եվրոպան բավարար և ժամանակին մատակարարումներ ապահովեր, հնարավոր է՝ բալիստիկ հրթիռները չհարվածեին Ուկրաինայի էներգետիկ ենթակառուցվածքներին։

Էներգետիկ ոլորտում օգնության մասով Ժովկվան ընդգծել է, որ Ուկրաինային անհրաժեշտ են կոնկրետ սարքավորումներ և տեխնիկական միջոցներ, որոնց ցանկը ներկայում մշակվում է Էներգետիկայի նախարարության կողմից։