ԵՄ-ն Հայաստանին 20 մլն եվրոյի աջակցությունը դիտարկում է որպես անվտանգության համագործակցության խորացման քայլ

Միջոցառումը նախատեսված է բարձրացնելու Հայաստանի դիմակայունությունը և նպաստելու զինված ուժերի փոխգործունակությանը:

Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը մեկնաբանել է Եվրոպական խաղաղության հիմնադրամի շրջանակներում Հայաստանին 20 միլիոն եվրոյի աջակցություն տրամադրելու վերաբերյալ ԵՄ խորհրդի որոշումը։ Մեկնաբանությունը հրապարակվել է Եվրոպական խորհրդի պաշտոնական կայքում։

Կայա Կալասի խոսքով՝ այս աջակցության միջոցառումը ևս մեկ քայլ է Եվրոպական միության և Հայաստանի միջև անվտանգության և պաշտպանության ոլորտում համագործակցության խորացման ուղղությամբ։

Նրա գնահատմամբ՝ Եվրոպական խաղաղության հիմնադրամի միջոցով տրամադրվող աջակցությունը վկայում է ԵՄ-ի հանձնառության մասին՝ շարունակելու աջակցել Հայաստանի դիմադրողականության բարձրացմանը, ինչը նպաստում է ոչ միայն երկրի, այլև ողջ տարածաշրջանի կայունությանը, խաղաղությանը և անվտանգությանը։

Եվրոպական միության խորհուրդը հաստատել է Եվրոպական խաղաղության հիմնադրամի շրջանակներում Հայաստանին 20 միլիոն եվրոյի օգնություն տրամադրելու որոշումը։ Խորհրդի պաշտոնական հաղորդագրության համաձայն՝ աջակցությունը նպատակ ունի ուժեղացնել Հայաստանի Հանրապետության զինված ուժերի լոգիստիկ կարողությունները՝ հատուկ ուշադրություն դարձնելով ճգնաժամային և արտակարգ իրավիճակներում քաղաքացիական բնակչության պաշտպանության ապահովմանը։

Նշվում է, որ միջոցառումը նախատեսված է բարձրացնելու Հայաստանի դիմակայունությունը և նպաստելու զինված ուժերի փոխգործունակությանը՝ ապագայում միջազգային ռազմական առաքելություններին և գործողություններին հնարավոր մասնակցության համատեքստում, այդ թվում՝ Եվրոպական միության կողմից իրականացվող առաքելություններին։

ԵՄ խորհրդի հայտարարության մեջ ընդգծվում է նաև Եվրոպական միության պատրաստակամությունը՝ ամրապնդելու Հայաստանի հետ համապարփակ քաղաքական և տնտեսական գործընկերությունը՝ հիմնվելով ԵՄ–ՀՀ գործընկերության նոր ռազմավարական օրակարգի վրա։