ԵՄ ներքին գործերի հանձնակատարն այցելել է Հայաստան․ քննարկվել է վիզաների ազատականացումը

Կողմերը նաև անդրադարձել են անօրինական միգրացիոն հոսքերի կրճատման և պատասխանատու միգրացիոն վարքագծի ձևավորման կարևորությանը։

Մարտի 12-ին ՀՀ ներքին գործերի նախարար Արփինե Սարգսյանն ընդունել է ԵՄ ներքին գործերի և միգրացիայի հարցերով հանձնակատար Մագնուս Բրուններին։

Նախարարը նշել է, որ առաջին անգամ է, երբ ԵՄ ներքին գործերի և միգրացիայի հանձնակատար է այցելում Հայաստան, ինչը, ըստ նրա, ընդգծում է երկկողմ համագործակցության խորացումն ու արձանագրված առաջընթացը գնահատելու կարևորությունը։

Որպես ՀՀ-ԵՄ վիզաների ազատականացման գործընթացում հայկական կողմի գլխավոր բանակցող՝ Արփինե Սարգսյանը հավաստիացրել է, որ Հայաստանի կառավարությունը լիովին հանձնառու է իրականացնել Վիզաների ազատականացման գործողությունների ծրագիրը (VLAP) ամբողջ ծավալով։ Նրա խոսքով՝ ծրագրով նախատեսված բարեփոխումները համահունչ են կառավարության ոլորտային օրակարգին։

Նշվել է, որ արդեն իրականացման տարբեր փուլերում են միգրացիայի և սահմանների կառավարման, ինչպես նաև իրավապահ մարմինների և արդարադատության ուղղություններով նախատեսված աշխատանքները։

Հանձնակատար Մագնուս Բրունները բարձր է գնահատել ՀՀ կողմից ներդրված ջանքերը՝ քաղաքացիների շարժունակությունը դեպի ԵՄ երկրներ ազատականացնելու ուղղությամբ։ Նա ընդգծել է, որ Հայաստանի պատրաստակամությունը՝ բարձր կատարողականով և ժամանակին առաջընթաց գրանցելու հարցում, կարող է հանգեցնել սպասվող արդյունքին։

Կողմերը նաև անդրադարձել են անօրինական միգրացիոն հոսքերի կրճատման և պատասխանատու միգրացիոն վարքագծի ձևավորման կարևորությանը։