Ընտրական ֆինանսավորման վերահսկողությունը կխստացվի․ ինչ նոր կարգավորումներ են գործելու

Վերահսկողության համար կիրականացվի նաև տարածքային ռեսուրսների ներգրավում՝ 38 ընտրատարածքներում։

Կենտրոնական ընտրական հանձնաժողովի նախագահ Վահագն Հովակիմյանը հայտարարել է, որ առաջիկա ընտրություններում քաղաքական ուժերի ֆինանսական հոսքերի վերահսկողությունը կուժեղացվի։

Նրա խոսքով՝ 2024 թվականին Ընտրական օրենսգրքում կատարված փոփոխություններից հետո փոխվել է նախընտրական ֆինանսավորման տրամաբանությունը։

Այսուհետ նախընտրական հիմնադրամ վճարումներ կարող են կատարել միայն կուսակցությունները, իսկ միջոցները պետք է նախապես առկա լինեն նրանց հաշվեհամարներում։

Կուսակցությունները կարող են նվիրատվություններ ստանալ քաղաքացիներից՝ տարեկան մինչև 10 մլն դրամ սահմանաչափով։

Հովակիմյանը ընդգծել է, որ այս մեխանիզմը ապահովում է ֆինանսական հոսքերի առավել թափանցիկ և վերահսկելի շրջանառություն։

ԿԸՀ-ն հետևելու է, որպեսզի քարոզարշավի ընթացքում կատարվող բոլոր ծախսերը լիարժեք արտացոլվեն հայտարարագրերում՝ ներառյալ շտաբների վարձակալությունը և գովազդային վճարումները։

Վերահսկողության համար կիրականացվի նաև տարածքային ռեսուրսների ներգրավում՝ 38 ընտրատարածքներում։

Բացի այդ, արտաքին գովազդի տեղադրումը ևս ենթակա է խիստ կարգավորման․ 5 քմ-ից մեծ վահանակները կարող են տեղադրվել միայն ԿԸՀ-ի բաշխմամբ։

Միաժամանակ նշվում է, որ ընտրություններից դուրս քաղաքական ուժերի ֆինանսական վերահսկողությունը ԿԸՀ լիազորությունների մեջ չի մտնում և գտնվում է Կոռուպցիայի կանխարգելման հանձնաժողովի տիրույթում։