ԵԱՏՄ-ում մի շարք ապրանքների համար կներդրվեն միասնական մակնշման կանոններ

Մակնշումը կիրականացվի միասնական տեխնոլոգիական մոդելի հիման վրա, որը ԵԱՏՄ-ում գործում է 2019 թվականից։

Եվրասիական տնտեսական հանձնաժողովի խորհուրդը հաստատել է որոշումներ, որոնցով սահմանվում են մի շարք ապրանքների մակնշման միասնական կանոններ ԵԱՏՄ երկրներում։

Խոսքը վերաբերում է թեյի, սուրճի, կակաոյի, ներկերի և լաքերի, մանկական խաղալիքների և շինանյութերի մակնշմանը։

ԵԱՏՀ-ի հաղորդմամբ՝ անդամ պետությունները ինքնուրույն կորոշեն իրենց տարածքներում այդ կանոնների կիրառման ժամկետներն ու կարգը՝ պարտադիր ծանուցելով հանձնաժողովին առնվազն վեց ամիս առաջ։

ԵԱՏՀ առևտրի նախարար Անդրեյ Սլեպնյովի խոսքով՝ մակնշվող ապրանքների ցանկի ընդլայնումը նպաստում է ընդհանուր համակարգի զարգացմանը և թույլ է տալիս սպառողներին վստահ լինել ապրանքների իսկության հարցում։

Նրա խոսքով՝ սա նաև կբարձրացնի օրինական բիզնեսի մրցունակությունը՝ նվազեցնելով անօրինական շրջանառությունը։

Նշվում է, որ մակնշումը կիրականացվի միասնական տեխնոլոգիական մոդելի հիման վրա, որը ԵԱՏՄ-ում գործում է 2019 թվականից։

Այս մոտեցումը կապահովի ապրանքների կոդերի փոխադարձ ճանաչում անդամ երկրների միջև և կազատի բիզնեսին վերամակնշման անհրաժեշտությունից։