Դիվանագիտական գրասենյակներ և աշխատավարձերի վերանայում. ԱԳՆ-ն փոխում է ծառայության կանոնները

ԱԳ նախարար Արարատ Միրզոյանը մայիսի 11-ի ԱԺ արտահերթ նիստում ներկայացրել է «Դիվանագիտական ծառայության մասին» օրենքում և կից օրենքներում փոփոխությունների նախագիծը։

Նախաձեռնությունը նպատակ ունի օպտիմալացնել դիվանագիտական ցանցը և բարձրացնել արտերկրում ծառայության գրավչությունը։

Դիվանագիտական գրասենյակների ստեղծում Առաջարկվում է ներդնել «դիվանագիտական գրասենյակի» մոդելը։ Այն կգործի այն երկրներում, որտեղ ամբողջական դեսպանություն բացելը ֆինանսապես նպատակահարմար չէ, սակայն կա ներկայացվածության կարիք։ Գրասենյակը կղեկավարի տվյալ երկրում հավատարմագրված ՀՀ դեսպանը։

Ռոտացիոն և ժամկետային փոփոխություններ

• Դեսպաններ. Ծառայության ժամկետը մեկ երկրում՝ առավելագույնը 5 տարի, վերանշանակման դեպքում՝ ընդհանուր առմամբ մինչև 8 տարի։

• Վերադարձ հայրենիք. Արտերկրում ծառայությունից հետո ԱԳՆ-ում աշխատելու պարտադիր ժամկետը 24 ամսից կրճատվում է 18 ամսի։

• Գլխավոր հյուպատոսներ. ԱԳՆ-ում աշխատելու ժամկետը սահմանվում է 12 ամիս, իսկ արտերկրում ծառայությունը՝ 3 տարի։

Ֆինանսական արդարություն և գրավչություն

• Դիվանագետ ամուսիններ. Վերացվում է գործող «աբսուրդ» կարգավորումը, ըստ որի գործուղված ամուսիններից մեկը ստանում էր աշխատավարձի միայն 50%-ը։ Այսուհետ երկուսն էլ կվարձատրվեն 100%-ով։

• Աշխատավարձերի հավասարեցում. Արտերկրում ծառայող դիվանագետների աշխատավարձերը կհավասարեցվեն Երևանում ԱԳՆ աշխատակիցների դրույքաչափերին։ Օրինակ՝ առաջին քարտուղարի աշխատավարձը արտերկրում 157-178 հազար դրամից կբարձրացվի՝ հասնելով Երևանի 267-366 հազար դրամ շեմին։