Դավոսում չի ստորագրվի Ուկրաինայի վերականգնման շուրջ 800 մլրդ դոլարի համաձայնագիրը

Կիևը հույս ունի, որ համաձայնագիրը կնպաստի նաև մասնավոր ներդրումների ներգրավմանը։

Վաշինգտոնը և Կիևը Դավոսում անցկացվող Համաշխարհային տնտեսական ֆորումի շրջանակում չեն ստորագրի Ուկրաինայի հետպատերազմյան վերականգնման վերաբերյալ շուրջ 800 միլիարդ դոլարի համաձայնագիրը, ինչպես նախատեսված էր նախապես։ Այս մասին հաղորդում է Axios-ը՝ հղում անելով ուկրաինական աղբյուրի։

Աղբյուրի փոխանցմամբ՝ փաստաթուղթը պետք է ստորագրեին ԱՄՆ նախագահ Դոնալդ Թրամփը և Ուկրաինայի նախագահ Վլադիմիր Զելենսկին, սակայն նրանց միջև նախատեսված հանդիպումը չեղարկվել է։

Axios-ի ամերիկյան աղբյուրի տեղեկություններով՝ համաձայնագրի ստորագրման հստակ ժամկետներ դեռևս չկան, իսկ ծրագիրը լրացուցիչ մշակման փուլում է։ Նշվում է, որ Թրամփը կարող է Դավոսում հանդիպել Զելենսկու և մի շարք եվրոպացի առաջնորդների հետ, սակայն այդ հանդիպումներից էական առաջընթաց չի սպասվում։

Ուկրաինայի նախագահ Վլադիմիր Զելենսկին հայտնել է, որ առայժմ կմնա Կիևում՝ Ռուսաստանի վերջին հարձակումներից հետո մի շարք շրջաններում էներգամատակարարման և ջերմամատակարարման վերականգնման հարցերով խորհրդակցություններ անցկացնելու համար։

Հիշեցնենք, որ դեկտեմբերի վերջին Կիևը ներկայացրել էր Ուկրաինայի տնտեսական վերականգնման և բարգավաճման ծրագիրը, որը նախատեսում է պատերազմի ավարտից հետո 10 տարվա ընթացքում շուրջ 800 միլիարդ դոլարի ներդրում։ Այդ գումարը մոտ չորս անգամ գերազանցում է երկրի նախապատերազմյան ՀՆԱ-ն։ Կիևը հույս ունի, որ համաձայնագիրը կնպաստի նաև մասնավոր ներդրումների ներգրավմանը։