Քաղաքացիներն ապրիլի 15-ից հետո ՀՀ երկրորդ սերնդի թղթադրամները կարող են անվճար փոխանակել բանկերում և Կենտրոնական բանկում

Ներկայումս երկրորդ սերնդի թղթադրամների հիմնական զանգվածը ունի բարձր ֆիզիկական մաշվածություն։

Քաղաքացիները 2026 թվականի ապրիլի 15-ից հետո ՀՀ երկրորդ սերնդի բոլոր թղթադրամները կարող են անվճար փոխանակել Հայաստանի տարածքում գործող առևտրային բանկերում և Կենտրոնական բանկում՝ առանց որևէ սահմանափակման։ Այս մասին հայտնում են ՀՀ Կենտրոնական բանկից։

Հիշեցնենք, որ Կենտրոնական բանկը 2025 թվականի ապրիլի 28-ին հայտարարել էր՝ ԿԲ խորհրդի որոշման համաձայն՝ 2026 թվականի ապրիլի 15-ից երկրորդ սերնդի թղթադրամները բնականոն մաշվածության արդյունքում դուրս կգան շրջանառությունից։

ԿԲ-ն հիշեցնում է, որ դեռևս 2017 թվականի հուլիսի 11-ի մամուլի հաղորդագրությամբ հատուկ նշվել էր՝ երկրորդ սերնդի թղթադրամները շրջանառությունից դուրս կբերվեն միայն այն ժամանակ, երբ դրամաշրջանառության ամբողջ շղթայում ամբողջությամբ ներդրվեն երրորդ սերնդի թղթադրամները և երկրորդ սերնդի թղթադրամները ունենան դրամաշրջանառության համար ոչ պիտանի ֆիզիկական մաշվածություն։

Ներկայումս երկրորդ սերնդի թղթադրամների հիմնական զանգվածը ունի բարձր ֆիզիկական մաշվածություն։ Շրջանառության մեջ գտնվող 1000, 5000, 10 000 և 20 000 դրամ անվանական արժեքներով թղթադրամների գերակշիռ մասը արդեն երրորդ սերնդի թողարկումներն են՝ Պարույր Սևակի, Վիլյամ Սարոյանի, Կոմիտասի և Հովհաննես Այվազովսկու դիմապատկերներով։ Իսկ 1999 թվականի թողարկման 500 դրամ թղթադրամները՝ Ալեքսանդր Թամանյանի դիմապատկերով, հիմնականում փոխարինվել են մետաղադրամներով։

Կենտրոնական բանկի որոշմամբ շրջանառությունից դուրս կհանվեն երկրորդ սերնդի հետևյալ թղթադրամները․

• 1999 թ․ թողարկման 500 դրամ (Ալեքսանդր Թամանյան)

• 1999, 2001, 2011, 2015 թթ․ թողարկման 1000 դրամ (Եղիշե Չարենց)

• 1999, 2003, 2009, 2012 թթ․ թողարկման 5000 դրամ (Հովհաննես Թումանյան)

• 2003, 2006, 2008, 2012 թթ․ թողարկման 10 000 դրամ (Ավետիք Իսահակյան)

• 1999, 2007, 2009, 2012 թթ․ թողարկման 20 000 դրամ (Մարտիրոս Սարյան)

Մինչև 2026 թվականի ապրիլի 15-ը նշված թղթադրամները կհամարվեն օրինական վճարամիջոց։ Այդ ժամկետից հետո քաղաքացիները կարող են իրենց մոտ մնացած բոլոր երկրորդ սերնդի թղթադրամները առանց սահմանափակումների և անվճար փոխանակել ՀՀ տարածքում գործող առևտրային բանկերում և Կենտրոնական բանկում։